యువకులకు అవకాశమిచ్చేందుకే ఈ నిర్ణయం: నబీ

బంగ్లాదేశ్​తో జరుగుతున్న టెస్టు మ్యాచ్ అనంతరం ఈ ఫార్మాట్​కు వీడ్కోలు పలకనున్నాడు అఫ్గానిస్థాన్ క్రికెటర్ మహ్మద్ నబీ. అతడి వీడియో సందేశాన్ని ట్విట్టర్​లో పంచుకుంది అఫ్గాన్ క్రికెట్ బోర్డు.

అఫ్గానిస్థాన్ స్టార్ క్రికెటర్, ఆల్​రౌండర్ మహ్మద్ నబీ.. టెస్టు క్రికెట్​కు రిటైర్మెంట్ ప్రకటించాడు. ఈ విషయంపై నబీ మాట్లాడుతున్న ఓ వీడియో సందేశాన్ని ట్విట్టర్​లో పోస్ట్ చేసింది ఆ దేశ క్రికెట్ బోర్డు. ప్రస్తుతం బంగ్లాదేశ్​తోజరుగుతున్న ఏకైక టెస్టు మ్యాచ్ అనంతరం వీడ్కోలు పలకనున్నాడీ క్రికెటర్.

"గత 18 ఏళ్లుగా అఫ్గానిస్థాన్ తరపున ప్రాతినిథ్యం వహిస్తున్నా. అఫ్గాన్​కు టెస్టు హోదా తీసుకురావాలనే నా కల సాకారమైంది. మేము ఏడాదికి ఒకటి లేదా రెండు టెస్టులు మాత్రమే ఆడుతున్నాం. అందులో భాగమవ్వాలని నేను అనుకుంటాను.ప్రతి ఆటగాడు 5 రోజుల క్రికెట్ ఆడాలనుకుంటాడు. అందుకే ఇప్పుడు నా స్థానంలో యువ క్రీడాకారులకు అవకాశమివ్వాలని భావిస్తున్నా". -మహ్మద్ నబీ వీడియో సందేశం.

టెస్టుల నుంచి వైదొలిగినా.. టీ-20, వన్డే ఫార్మాట్​లో కొనసాగనున్నాడు మహ్మద్ నబీ. ఐపీఎల్​తో పాటు బిగ్​బాష్ ప్రీమియర్ లీగ్​లోనూ ఆడుతున్నాడు. 121 వన్డేలాడిన ఈ అఫ్గాన్ ఆల్​రౌండర్... 2, 699 పరుగులతో పాటు 128 వికెట్లు తీశాడు. టీ 20ల్లో 1,161 పరుగులతో పాటు 69 వికెట్లు తన ఖాతాలో వేసుకున్నాడు.

ఇదీ చదవండి: 'ధోనికి సరైన రీతిలో వీడ్కోలు పలకాలి'