యాషెస్ సిరీస్‌లో భాగంగా లార్డ్స్ వేదికగా జరగనున్న రెండో టెస్టులో ఇంగ్లాండ్, ఆసీస్ ఆటగాళ్లు ఎర్ర టోపీలు ధరించనున్నారు. ఊపిరితిత్తుల కేన్సర్ బాధితుల కోసం విరాళాలు సేకరించేందుకు రూత్ స్ట్రాస్ ఫౌండేషన్తో కలిసి ఈ కార్యక్రమానికి శ్రీకారం చుట్టారు. మ్యాచ్ వీక్షించేందుకు వచ్చిన ప్రేక్షకులూ ఎరుపు రంగు దుస్తుల్లో రావాల్సిందిగా లార్డ్స్ మైదానం నిర్వాహకులు కోరారు.
ఎవరీ రూత్..?
డిసెంబర్ 2018లో ఊపిరితిత్తుల కేన్సర్‌తో ఆండ్రూ స్ట్రాస్ భార్య రూత్ మరణించింది. ఆమె జ్ఞాపకార్థం ఈ ఫౌండేషన్ స్థాపించారు. బుధవారం నుంచి ప్రారంభమయ్యే ఈ మ్యాచ్ ద్వారా వచ్చిన డబ్బులను లంగ్ కేన్సర్ బాధితుల వైద్యం కోసం ఫౌండేషన్‌కు విరాళంగా ఇవ్వనున్నారు. మ్యాచ్ చూసేందుకు వచ్చిన వారికి ఈ మహమ్మారిపై అవగాహన కల్పించనున్నారు.