కొత్త జెర్సీపై రైనా ట్వీట్.. ధోనీపై ప్రశంసలు

సీఎస్కే కొత్త జెర్సీ గురించి రైనా ట్వీట్ చేశాడు. దానిని త్వరగా వేసుకోవాలని ఉవ్విళ్లూరుతున్నట్లు చెప్పాడు. ఏప్రిల్ 9 నుంచి ఐపీఎల్ కొత్త సీజన్ ప్రారంభమవుతుంది.

చెన్నై సూపర్​కింగ్స్​ స్టార్ క్రికెటర్ సురేశ్​ రైనా.. తమ జట్టు కొత్త జెర్సీ వేసుకునేందుకు ఆత్రుతగా ఉన్నాడు. ఈ విషయాన్నే ట్విట్టర్ వేదికగా పంచుకున్నాడు.

"మన దేశానికి ఎంతో సేవ చేస్తున్న ఆర్మీ జవాన్ల గౌరవార్థం జెర్సీలో మార్పులు చేసినందుకు చెన్నై సూపర్​కింగ్స్, ధోనీకి అభినందనలు. దానిని ధరించేందుకు చాలా ఆత్రుతగా ఉన్నాను" అని రైనా ట్వీట్ చేశాడు.

ట్రైనింగ్ క్యాంప్ కోసం ముంబయికి చేరుకున్న రైనా.. త్వరలో జట్టుతో కలవనున్నాడు. చెన్నై జట్టు తన తొలి మ్యాచ్​లో దిల్లీ క్యాపిటల్స్​తో తలపడనుంది. వాంఖడే స్టేడియం వేదికగా ఏప్రిల్ 10న ఈ పోరు జరగనుంది.