బోర్డర్-గావస్కర్ ట్రోఫీని ఓటమితో మొదలుపెట్టిన భారత జట్టుకు ఆస్ట్రేలియా బ్యాట్స్మన్ స్టీవ్స్మిత్ సలహా ఇచ్చాడు. 'గతాన్ని వదిలేసి ముందుకు సాగండి' అంటూ కోహ్లీసేనను ఉద్దేశించి మాట్లాడాడు. తొలి టెస్టులో ఓడిన టీమ్ఇండియా, రెండో టెస్టులో ఎలా ప్రతీకారం తీర్చుకుంటుందే అనే విషయం తాను అస్సలు ఆలోచించట్లేదని అన్నాడు.
"ఈ పరిస్థితిలో ముందుకు సాగడం ముఖ్యం. మీలో(భారత జట్టు) ప్రతి ఒక్కరూ బాగా రాణించారు. టీమ్ఇండియా గురించి ఎక్కువగా ఆలోచించడం లేదు. నాకు తెలిసి ఆ జట్టులో ఇద్దరూ నైపుణ్యం కలిగిన బౌలర్లు ఉన్నారు. ఇప్పటికే ఇషాంత్ సిరీస్కు దూరమయ్యాడు. అనుభవం కలిగిన ఆటగాళ్లతో పోలిస్తే భారత జట్టుకు ఇది పెద్ద లోటు. అదే విధంగా కోహ్లీ, షమి ఆడకపోవడం వల్ల ఆ జట్టుపై ప్రభావం పడే అవకాశం ఉంది"
- స్టీవ్స్మిత్, ఆస్ట్రేలియా బ్యాట్స్మన్
ఆస్ట్రేలియా బౌలింగ్ త్రయం మిచెల్ స్టార్క్, పాట్ కమిన్స్, జోష్ హేజిల్వుడ్.. ఇటీవల కాలంలో అద్భుతంగా బౌలింగ్ చేస్తున్నారు. వీళ్ల బౌలింగ్లోనే టీమ్ఇండియా 36 పరుగులకే ఆలౌటైంది. ఫలితంగా 8 వికెట్ల తేడాతో ఆసీస్ తొలి టెస్టులో ఘనవిజయాన్ని అందుకుంది. ఈ సిరీస్లోని రెండో టెస్టు (బాక్సింగ్ డే టెస్టు) మెల్బోర్న్ వేదికగా డిసెంబరు 26 నుంచి ప్రారంభం కానుంది.
కోహ్లీది సరైన నిర్ణయమే!
టీమ్ఇండియా కెప్టెన్ విరాట్ కోహ్లీ పితృత్వ సెలవులపై స్వదేశానికి వెళ్లడం సరైన నిర్ణయమని స్మిత్ అన్నాడు. జీవితంలో తొలిసారి వచ్చే అనుభూతిని కోల్పోకూడదని అభిప్రాయపడ్డాడు. "టెస్టు సిరీస్లో మిగిలిన మ్యాచ్ల్లో కోహ్లీ అందుబాటులో లేకపోవడం కచ్చితంగా టీమ్ఇండియాకు పెద్ద నష్టమే! మొదటి టెస్టు తొలి ఇన్నింగ్స్లో అతడు క్లాస్గా బ్యాటింగ్ చేశాడు. తొలి టెస్టు ముగిశాక కోహ్లీ వెళ్తున్నప్పుడు..'ప్రయాణంలో జాగ్రత్త. ప్రసవంలో అంతా మంచే జరుగుతుందని ఆశిస్తున్నా. నీ భార్యకు శుభాకాంక్షలు తెలియజేయి' అని చెప్పాను. అయితే ఈ పరిస్థితిలో అతడు స్వదేశానికి వెళ్లడమే సరైన నిర్ణయం. ఒకవేళ ఇక్కడే ఉంటే అతడిపై చాలా ఒత్తిడి పెరుగుతుంది. పితృత్వ సెలవులు తీసుకునే అర్హత అతడికి ఉంది. తన భార్య ప్రసవించే క్రమంలో అతడు దగ్గర ఉండడం ఎంతో ముఖ్యం" అని స్మిత్ చెప్పాడు.
ఇదీ చూడండి:సర్ బ్రాడ్మన్ టెస్టు క్యాప్కు భారీ ధర
