టీమ్ఇండియా మాజీ సారథి మహేంద్రసింగ్‌ ధోనీ రిటైర్మెంట్ ప్రకటించాక ఇంగ్లాండ్ మాజీ బ్యాట్స్‌మన్‌ కెవిన్ పీటర్సన్ ఆసక్తికర వ్యాఖ్యలు చేశాడు. అందరూ చెప్పుకునేట్టు టెస్టు క్రికెట్‌లో తాను అతడికి తొలి వికెట్‌ కాదని స్పష్టంచేశాడు.
"ధోనీ నాకు మంచి మిత్రుడు. అతడి కెరీర్‌ చాలా గొప్పగా సాగింది. అదొక మ్యాజికల్‌ కెరీర్‌ అని చెప్పొచ్చు. అలాంటి ఆట పట్ల గర్వంగా ఉండాలి. ధోనీ ఆట చూడటానికి భారత దేశంతో పాటు క్రికెట్‌ ప్రపంచం కూడా అదృష్టం చేసుకుంది. అయితే, ఇప్పుడు నీ క్రికెట్‌ కెరీర్‌ పూర్తయిన సందర్భంగా ఒక విషయం చెప్పాలి. లార్డ్స్‌ టెస్టులో నన్ను ఔట్ చేశావని, టెస్టుల్లో నేను నీకు తొలి వికెట్‌ అని.. నువ్వూ, నీ అభిమానులు నన్నెప్పుడూ అంటుంటారు. కానీ అది జరగలేదని నీకూ నాకు తెలుసు. నువ్వు రిటైర్మెంట్ ప్రకటించడం వల్ల ఈ విషయంపై స్పష్టతనిస్తున్నా. అదెప్పుడూ జరగలేదు. ఏదైమైనా అద్భుతమైన కెరీర్‌కు కంగ్రాట్స్‌. మా క్లబ్‌లోకి సుస్వాగతం."