వెన్నెముక గాయంతో ప్రస్తుతం జట్టుకు దూరంగా ఉన్నాడు టీమిండియా స్టార్ పేసర్ జస్ర్పీత్ బుమ్రా. గాయం నుంచి కోలుకుని పునరాగమనం చేయడానికి శ్రమిస్తున్నాడు. తాజాగా బుమ్రా సామాజిక మాధ్యమాల్లో ఓ పోస్ట్ పెట్టాడు. ఇందులో మైదానంలో పరుగెడుతూ కనిపిస్తున్నాడు. "నిలిచా.. పరుగెడుతున్నా" అంటూ క్యాప్షన్ ఇచ్చాడు. అంటే వేగంగా కోలుకుంటానని పరోక్షంగా చెబుతున్నాడు.
వెస్టిండీస్‌ సిరీస్‌ తర్వాత బుమ్రా మళ్లీ బంతి పట్టుకోలేదు. అతడి వెన్నెముక దిగువ భాగాన గాయమైంది. శస్త్రచికిత్స అవసరం అవుతుందేమోనని అంతా కంగారు పడ్డారు. కొన్నాళ్లు విశ్రాంతి తీసుకుంటే సరిపోతుందని వైద్య నిపుణులు వెల్లడించారు. ఎందుకంటే శస్త్రచికిత్స చేస్తే కనీసం 6-8 నెలలు ఆట నుంచి విరామం తీసుకోవాలి. ప్రస్తుతం బెంగళూరులోని జాతీయ క్రికెట్‌ అకాడమీలో బుమ్రా విశ్రాంతి తీసుకుంటున్నాడు. రోజురోజుకూ మెరుగవుతున్నాడు. జనవరిలో లోగా అతడు జట్టులో చేరతాడని అంచనా వేస్తున్నారు.