సిక్స్​ కొట్టి సొంత కారు అద్దం పగలగొట్టుకున్నాడు!

ఐర్లాండ్​ క్రికెటర్​ కెవిన్​ ఓబ్రియాన్​ ఇటీవలే ఓ మ్యాచ్​లో ఎనిమిది సిక్సర్లు కొట్టాడు. అయితే, అందులో ఒక సిక్స్ వల్ల పార్కింగ్​లో ఉంచిన తన కారు అద్దం పగిలిపోయింది.

ఐర్లాండ్​ క్రికెటర్ కెవిన్​ ఓబ్రియాన్​​ బ్యాటింగ్​ ప్రదర్శన గురించి ప్రత్యేకంగా చెప్పనక్కర్లేదు. అయితే తొలిసారి తన బ్యాటింగ్​ పరాక్రమానికి చింతించాడు ఈ స్టార్​ ప్లేయర్​. ఇటీవలే జరిగిన ఓ మ్యాచ్​లో అద్భుతమైన సిక్సర్​ను కొట్టగా.. బంతి నేరుగా వెళ్లి అతని కారు అద్దాన్ని పగలగొట్టింది. ఈ మ్యాచ్​లో ఎనిమిది సార్లు బంతిని సిక్సర్​తో బౌండరీ దాటించగా.. అందులో ఒకటి పార్కింగ్​లో ఉంచిన తన కారును తాకింది. మ్యాచ్​ ముగిసిన అనంతరం.. అద్దాన్ని మార్చేందుకు కారును నేరుగా గ్యారేజీకి తీసుకెళ్లాడు ఓబ్రియాన్. ఇకపై మరింత దూరంలో కారును పార్క్​ చేస్తానని ట్వీట్​ చేశాడు.

లీన్‌స్టర్‌ లైట్నింగ్‌, నార్త్‌ వెస్ట్‌ వారియర్స్‌ జట్ల మధ్య గురువారం ఓ టీ20 మ్యాచ్‌ జరిగింది. అయితే, వరుణుడు అంతరాయం కలిగించడం వల్ల మ్యాచ్‌ను చెరో 12 ఓవర్ల పాటే ఆడించారు. ఈ సందర్భంగా తొలుత బ్యాటింగ్‌ చేసిన లీన్‌స్టర్‌ నిర్ణీత ఓవర్లలో 124/4 భారీ స్కోర్‌ చేసింది. కెవిన్‌ ఓబ్రియాన్‌(82; 37 బంతుల్లో 8x6) తన బ్యాటింగ్‌తో నల్లమబ్బుల్లోనూ చుక్కలు చూపించాడు. అనంతరం బ్యాటింగ్‌కు దిగిన నార్త్‌ వెస్ట్‌ వారియర్స్‌ 12 ఓవర్లలో 8 వికెట్లు కోల్పోయి 104 పరుగులే చేసింది. పోర్టర్‌ఫీల్డ్‌(50) అర్ధశతకంతో రాణించినా అతడికి సహకరించే బ్యాట్స్‌మన్‌ లేక ఆ జట్టు 20 పరుగుల తేడాతో ఓటమిపాలైంది.

2011 ప్రపంచ కప్ చరిత్రలోనే అత్యంత వేగవంతమైన సెంచరీ చేసిన క్రికెటర్​గా ఓబ్రియాన్​ గుర్తింపు పొందాడు. ఈ మ్యాచ్​లో ఇంగ్లాండ్​పై ఐర్లాండ్​ ఘన విజయం సాధించి అందరి దృష్టిని ఆకర్షించింది.