ఇండియన్‌ ప్రీమియర్‌ లీగ్‌ (ఐపీఎల్) భారత క్రికెట్ దశను మార్చేసిందని పాకిస్థాన్ మాజీ ఆల్రౌండర్ షాహిద్ అఫ్రిది అభిప్రాయపడ్డాడు. త్వరలోనే భారత్, పాకిస్థాన్ మధ్య ద్వైపాక్షిక సిరీస్లు జరుగుతాయని ఆశాభావం వ్యక్తం చేశాడు.
"ఐపీఎల్‌తో భారత క్రికెట్ దశ తిరిగింది. భారత యువ ఆటగాళ్లు అగ్రశ్రేణి విదేశీ క్రికెటర్లతో కలిసి ఆడటం, అంతేకాక వారితో డ్రెస్సింగ్‌ రూమ్‌ను పంచుకోవడం వల్ల.. అంతర్జాతీయ క్రికెట్‌లో సత్తా చాటుతున్నారు. ఒత్తిడిలో ఎలా సమర్థవంతంగా పోరాడాలో ఐపీఎల్‌లో తెలుసుకున్నారు. భారత క్రికెట్‌ను ఐపీఎల్ ఎలా మార్చేసిందో పాకిస్థాన్ సూపర్ లీగ్‌ (పీఎస్‌ఎల్‌) కూడా పాక్‌ క్రికెట్‌ను మార్చేస్తుందని భావిస్తున్నా. ఇప్పటికే ఎంతోమంది యువ ఆటగాళ్లు పీఎస్‌ఎల్‌తో వెలుగులోకి వచ్చారు. స్టేడియంలో వేలాదిమంది ప్రేక్షకుల మధ్య అనుభవజ్ఞులైన విదేశీ ఆటగాళ్లతో కలిసి ఆడితే ఒత్తిడిని ఎలా తట్టుకోవాలో తెలుసుకోవచ్చు. ఫిట్‌గా ఉన్నంత వరకు నేను పొట్టి లీగ్‌ల్లో కొనసాగుతా."