ఏడేళ్లకు ఐపీఎల్​లోకి పుజారా- చెన్నైకి కృతజ్ఞతలు

టీమ్​ఇండియా టెస్టు స్పెషలిస్టు ఛెతేశ్వర్​ పుజారా ఈ సారి ఐపీఎల్​లో కనిపించనున్నాడు. గురువారం జరిగిన వేలంలో చెన్నై జట్టు అతన్ని కొనుగోలు చేసింది.

సుదీర్ఘ ఫార్మాట్లో టీమ్​ఇండియా ప్రధాన బ్యాట్స్​మెన్​ ఛెతేశ్వర్​ పుజారా ఎట్టకేలకు తిరిగి ఐపీఎల్​లో ఆడనున్నాడు. గురువారం చెన్నై వేదికగా జరిగిన ఐపీఎల్​ వేలంలో అతన్ని చెన్నై సూపర్​ కింగ్స్​ జట్టు కొనుగోలు చేసింది. రూ.50 లక్షల బేస్​ ప్రైస్​కే అతన్ని సొంతం చేసుకుంది.

"వేలం ద్వారా లెజెండ్​ ఛెతేశ్వర్​ను మేం సీఎస్​కేలోకి చప్పట్లతో ఆహ్వానిస్తున్నాం. విజిల్​పోడు. సూపర్​ ఆక్షన్​." అని సీఎస్​కే తన అధికారిక ట్విట్టర్​ పేజీలో రాసుకుంది.

గత నెలలో ఐపీఎల్​ ఆడాలన్న తన అభిలాషను వ్యక్తం చేశాడు పుజారా. టెస్టు క్రికెట్​కు సరిగ్గా సరిపోయే అతని బ్యాటింగ్​ శైలి వల్ల అతనికి పొట్టి ఫార్మాట్లో అంతగా అవకాశాలు రాలేదు.

చివరిసారిగా 2014లో పంజాబ్​ కింగ్స్(పాత పేరు కింగ్స్​ ఎలెవన్​ పంజాబ్​)​ తరఫున ఐపీఎల్​లో ఆడిన ఈ నయావాల్​.. 30 మ్యాచ్​ల్లో 390 పరుగులు చేశాడు. ఇప్పటివరకు 83 టెస్టులు ఆడిన పుజారా 13,834 పరుగులు సాధించాడు. పరిమిత ఓవర్ల క్రికెట్​లో కేవలం 5 వన్డేలు మాత్రమే ఆడి 130 రన్స్ తన ఖాతాలో వేసుకున్నాడు. ఇంతవరకు ఒక్క టీ20 మ్యాచ్​ ఆడకపోవడం గమనార్హం.

థ్యాంక్స్​ చెన్నై..

తనపై నమ్మకం ఉంచినందుకు పుజారా.. చెన్నై ఫ్రాంఛైజీకి కృతజ్ఞతలు తెలిపాడు. ఈ విషయాన్ని ట్విట్టర్​ ద్వారా తెలియజేశాడు.

ఇదీ చదవండి:కేకేఆర్​కు భజ్జీ​.. సన్​రైజర్స్ గూటికి జాదవ్​