15 ఏళ్లకే అంతర్జాతీయ క్రికెట్లోకి అడుగుపెట్టి రికార్డు సృష్టించింది షెఫాలీ వర్మ. మహిళా ఐపీఎల్‌లోనూ ధనాధన్‌ బ్యాటింగ్‌తో అందరి దృష్టి ఆకర్షించింది. ఆ తర్వాత దక్షిణాఫ్రికా సిరీస్‌కు ఎంపికైంది. తన తొలి మ్యాచ్‌లో డకౌట్‌గా వెనుదిరిగినా తర్వాతి మ్యాచ్‌లో 46 పరుగులతో జట్టును విజేతగా నిలిపింది. అయితే క్రికెట్ అకాడమీలో చేరేందుకు షెఫాలీ అబ్బాయిలా తన వేషధారణ మార్చుకుందని ఆమె తండ్రి సంజీవ్ అన్నారు.
"అమ్మాయి అని చెబితే క్రికెట్ అకాడమీలో చేర్పించుకునేందుకు ఎవరూ ముందుకు రాలేదు. అవకాశం ఇవ్వమని బతిమలాడినా ప్రయోజనం లేకుండా పోయింది. మా ప్రాంతంలో మహిళల క్రికెట్ అకాడమీ లేదు. అందుకే షెఫాలీకి అబ్బాయిలా హెయిర్‌ కట్‌ చేయించి అకాడమీలో చేర్చాను. ఏమైనా జరుగుతుందేమోనని భయపడ్డాను. కానీ ఎవరూ షెఫాలీని అమ్మాయిగా గుర్తుపట్టలేదు. ఎందుకంటే అప్పుడు ఆమె వయసు తొమ్మిది సంవత్సరాలు. క్రికెట్లో పురుషులతో మహిళలు పోటీపడటం అంత సులువు కాదు. షెఫాలీ హెల్మెట్‌కు ఎన్నో సార్లు బంతి బలంగా తగిలింది. అయినా తను క్రికెట్‌ను వదల్లేదు" -సంజీవ్, షెఫాలీ తండ్రి