ఇంగ్లాండ్​తో​ సిరీస్​కు ముగ్గురు భారత అంపైర్లు

త్వరలో ప్రారంభం కానున్న భారత్​, ఇంగ్లాండ్​ టెస్టు సిరీస్​కు స్వదేశీ అంపైర్లను బీసీసీఐ ప్రకటించింది. వీరేందర్​ శర్మ, అనిల్​ చౌదరి, నితిన్​ మేనన్ ఫీల్డ్​ అంపైర్లుగా వ్యవహరించనున్నారు.

ఫిబ్రవరి 5న ప్రారంభం కానున్న భారత్​, ఇంగ్లాండ్ టెస్టు సిరీస్​కు.. ముగ్గురు భారత అంపైర్లను ప్రకటించింది బీసీసీఐ. ఈ సిరీస్​ ద్వారా ఐసీసీ ప్యానల్​ అంపైర్లైన వీరేందర్ శర్మ, అనిల్​ చౌదరి.. సుదీర్ఘ ఫార్మాట్లో ఆన్​ ఫీల్డ్​ అంపైర్లుగా అరంగ్రేటం చేయనున్నారు.

ఇండియన్​ ఎలీట్ ప్యానెల్​ ప్రతినిధి నితిన్​ మేనన్​ కూడా ఐసీసీ ప్యానల్​లో భాగం కానున్నట్లు బీసీసీఐ వర్గాలు పేర్కొన్నాయి. ఈయన గత మ్యాచ్​లో ఆన్​ ఫీల్డ్​ అంపైర్​గా పనిచేశారు.

కొవిడ్​ నిబంధనల కారణంగా.. ప్రపంచ టెస్టు ఛాంపియన్​షిప్​లోని మ్యాచ్​లకు ఆతిథ్య దేశ అంపైర్లను.. ఐసీసీ అంగీకరించింది.

ముందుగా తమిళనాడుకు చెందిన సుందరం రవికి అవకాశం రావాల్సి ఉండగా.. టెస్టుల్లో సరైన పనితీరు ప్రదర్శించిన​ కారణంగా అతణ్ని ప్యానల్​ నుంచి తప్పించారు. దీంతో మేనన్​కు మార్గం సుగమమైంది. ఇప్పటివరకు ఈయన మూడు టెస్టులతో పాటు 24 వన్డేలకు, 16 టీ20లకు అంపైర్​గా వ్యవహరించిన అనుభవం ఉంది.

వీరేందర్​ శర్మ ఒక టీ20తో పాటు రెండు వన్డేలకు అంపైర్​గా పనిచేయగా.. చౌదరి 20 వన్డేలు, 28 టీ20లకు ఫీల్డ్​ అంపైర్​గా వ్యవహరించారు.

ఇదీ చదవండి:పంత్​ను ఆట పట్టిస్తున్న నెటిజన్లు.. ఎందుకంటే?