సచిన్​, ద్రవిడ్​ తర్వాత ఈ యువ క్రికెటర్​దే రికార్డు!

టీమిండియా నయావాల్​ ఛెతేశ్వర్​ పుజారా కెరీర్​లో మరో ఘనత సాధించాడు. రంజీల్లో సౌరాష్ట్ర తరఫున ఆడుతూ, ఫస్ట్​క్లాస్ క్రికెట్​లో మరో​ సెంచరీ సాధించాడు. కెరీర్​లో ఇతడికిది 50వ శతకం. ఈ ఘనతతో దిగ్గజాలు సచిన్​ తెందూల్కర్​, సునీల్​ గావస్కర్​, రాహుల్​ ద్రవిడ్​ సరసన నిలిచాడు.

టీమిండియా తరఫున సుదీర్ఘ ఫార్మాట్​లోగతేడాది నిలకడ ప్రదర్శన చేసిన పుజారా... ఈ సంవత్సరమూ అదే జోరు కొనసాగిస్తున్నాడు. సౌరాష్ట్రకు చెందిన ఈ క్రికెటర్..​ కెరీర్​లో మరో ఫస్ట్​క్లాస్​ సెంచరీ చేశాడు. ఈ ఫార్మాట్​లో 50 సెంచరీల మైలురాయిని అందుకున్నాడు. ఇప్పటివరకు ఈ ఫీట్​ సాధించిన దిగ్గజాలు సచిన్​, గావస్కర్​, ద్రవిడ్​ సరసన చోటు దక్కించుకున్నాడు. శనివారం కర్ణాటకతో జరిగిన రంజీ మ్యాచ్​లో ఈ ఘనత సాధించాడు పుజారా.

అయితే ఫస్ట్​క్లాస్​ క్రికెట్​లో ఎక్కువ శతకాలు చేసిన భారత బ్యాట్స్​మెన్ జాబితాలో సచిన్​, గావస్కర్​(81) అగ్రస్థానంలో ఉన్నారు. ద్రవిడ్​ 68 సెంచరీలతో రెండో స్థానంలో పుజారా కంటే ముందున్నారు.

నాలుగోవాడు

ఫస్ట్​క్లాస్​లో 50 సెంచరీలు మార్క్ అందుకుని.. ఇప్పటికీ ఆడుతున్న వారిలో నాలుగో స్థానంలో ఉన్నాడు పుజారా. ఇతడి కంటే ముందు అలిస్టర్​ కుక్​(65), వసీం జాఫర్​(57), హసీం ఆమ్లా(52) ఉన్నారు. వీరందరిలో పిన్నవయస్కుడిగా పేరు తెచ్చుకున్నాడీ నయావాల్​. ఇతడికి ప్రస్తుతం 31 ఏళ్లు. ఇతడితో సహా ఆటగాళ్లయిన కోహ్లీ(34), రహానే(32).. ఫస్ట్​క్లాస్​లో ఇతడి కంటే తక్కువ శతకాలే చేశారు.

సౌరాష్ట్ర తొలిరోజు ఆట ముగిసేసరికి 2 వికెట్ల నష్టానికి 296 పరుగులు​ చేసింది. పుజారా 162 పరుగులతో నాటౌట్​గా ఉన్నాడు.