భారత్, వెస్టిండీస్ మధ్య చివరిదైన రెండో టెస్టు ఆసక్తికరంగా సాగుతోంది. ముందుగా బ్యాటింగ్‌కు దిగిన భారత్ తొలి రోజు ఆట ముగిసే సమయానికి 90 ఓవర్లలో 5 వికెట్ల నష్టానికి 264 పరుగులు చేసింది. సారథి విరాట్‌కోహ్లీ (76; 163బంతుల్లో 10×4), ఓపెనర్‌ మయాంక్ అగర్వాల్‌ (55; 127బంతుల్లో 7×4) అర్ధశతకాలతో ఆకట్టుకున్నారు. పుజారా (6) ఈ మ్యాచ్‌లోనూ విఫలమయ్యాడు. ప్రస్తుతానికి క్రీజులో హనుమ విహారి (42 బ్యాటింగ్), రిషభ్ పంత్ (27 బ్యాటింగ్) ఉన్నారు.
దక్కని శుభారంభం..
రెండో టెస్టులోనూ భారత్‌కు సరైన ఆరంభం దక్కలేదు. పిచ్‌పై కాస్త పచ్చిక ఉండటం వల్ల విండీస్ సారథి హోల్డర్ టాస్‌ గెలిచి ఫీల్డింగ్‌ ఎంచుకున్నాడు. ఓపెనర్లు రాహుల్‌, మయాంక్ అగర్వాల్‌ తొలి అరగంట పాటు ఆచితూచి ఆడారు. ఏడో ఓవర్లో కేఎల్ (13) హోల్డర్ బౌలింగ్‌లో ఔట్‌ అయ్యాడు. తర్వాత క్రీజులోకి వచ్చిన పుజారా (6) ఆరంభం నుంచే ఇబ్బందిపడ్డాడు. కార్న్‌వాల్‌ బౌలింగ్‌లో బ్రూక్స్‌ చేతికి చిక్కాడు. ఫలింతంగా 46 పరుగులకే 2 వికెట్లు కోల్పోయింది టీమిండియా.
విరాట్‌ విలువైన ఇన్నింగ్స్..
17వ ఓవర్‌లోనే క్రీజులోకి వచ్చినకోహ్లీ.. మయాంక్‌తో కీలక ఇన్నింగ్స్ ఆడాడు. మయాంక్ మొదట్లో కాస్త ఇబ్బందిపడ్డా మ్యాచ్‌ సాగుతున్నకొద్దీ మరింత బాధ్యతాయుతంగా ఆడాడు. వీలైనప్పుడు బౌండరీలు రాబట్టాడు. కార్న్‌వాల్‌ బౌలింగ్‌లో కాస్త ఇబ్బంది పడినా పట్టుదలగా నిలిచాడు కోహ్లీ. లంచ్‌ సమయానికి స్కోరు 2 వికెట్ల నష్టానికి 72 పరుగులు చేసింది భారత్. విరామం తర్వాత బ్యాట్స్‌మెన్‌ ఇద్దరూ వేగం పెంచారు. రోచ్‌ ఓవర్లో రెండు ఫోర్లతో మయాంక్ అర్ధశతకం పూర్తి చేసుకున్నాడు. కానీ కాసేపటికే హోల్డర్ బౌలింగ్‌లో ఔటయ్యాడు.
వైస్‌ కెప్టెన్‌ రహానెతోనూ కోహ్లీ 49 పరుగుల విలువైన భాగస్వామ్యం నెలకొల్పాడు. రహానె కాస్త నిదానంగా ఇన్నింగ్స్ సాగించినా.. కోహ్లీ మాత్రం అదే జోరు కొనసాగించాడు. గాబ్రియెల్ బౌలింగ్‌లో అర్ధశతకం అందుకున్నాడు. మరోవైపు రహానె (24) కూడా బ్యాట్‌ ఝళిపించే ప్రయత్నంలో రోచ్‌ బౌలింగ్‌లో వికెట్‌కీపర్‌ హామిల్టన్‌ చేతికి చిక్కాడు. అయినప్పటికీకోహ్లీ అదే పట్టుదలతో పోరాడాడు. చూడచక్కని షాట్లతో అలరించాడు. వీలుచిక్కినప్పుడల్లా బౌండరీలు సాధిస్తూ ముందుకు సాగాడు. కానీ బంతిని సరిగా అంచనా వేయలేక హోల్డర్ బౌలింగ్‌లో హామిల్టన్‌ చేతికి చిక్కాడు.