ప్రపంచ క్రికెట్లో ప్రతిభావంతమైన సారథులు, వారికి తోడు సరైన బృందం ఉన్న జట్లలో భారత్, న్యూజిలాండ్ టాప్లో ఉంటాయి. దూకుడు, మెరుపు ఆట కలగలిపిన కోహ్లీ ఒకవైపు... నెమ్మది, వ్యూహాత్మక నేర్పరితనం కూడిన సారథి విలియమ్సన్ మరోవైపు. వీరిద్దరూ అండర్-19 నుంచే అత్యుత్తమ సారథులు. మరి అలాంటి స్టార్ ఆటగాళ్ల కెప్టెన్సీల్లోని జట్లు నేడు పొట్టి ఫార్మాట్లో తలపడనున్నాయి. మ్యాచ్ ఈరోజుమధ్యాహ్నం 12.20 నిముషాలకు ప్రారంభం కానుంది.
గతేడాది ఇంగ్లాండ్‌లో జరిగిన ప్రపంచకప్ సెమీస్‌లో కోహ్లీసేన 18 పరుగుల తేడాతో విలియమ్సన్ బృందం చేతిలోనే ఓడిపోయింది. ఈ మ్యాచ్లో భారత్కు వరుణుడు అన్యాయం చేసినా.. కివీస్ ప్రదర్శన తక్కువని చెప్పలేం. అయితే ఆ మెగాటోర్నీ తర్వాత తొలిసారి ఆ జట్టుతో పోటీపడనుంది మెన్ ఇన్ బ్లూ. అయితే పగ, ప్రతీకారం వంటి ఆలోచనలు లేవని ప్రేమపూర్వక పోటీ మాత్రమే ఉందచి మీడియాతో చెప్పాడు విరాట్ కోహ్లీ. కివీస్ ఆటగాళ్లందరూ ఎంతో మంచివారని ప్రశంసించాడు.
" న్యూజిలాండ్ ఆటగాళ్లందరూ చాలా చాలా మంచివారు. వారితో ఆడుతుంటే ప్రతీకారం తీర్చుకోవాలని అస్సలు అనిపించదు. ఎన్నో ఏళ్లుగా మేం వారితో కలిసిమెలిసి ఆడుతున్నాం. ప్రతిసారీ మైదానంలో పోటీ గురించీ ధ్యాస ఉంటుంది. ఇంగ్లాండ్‌లో వారు అంతర్జాతీయ క్రికెట్ ఆడే దేశాలకు ఆదర్శంగా నిలిచారు. ప్రతి బంతి, ప్రతి మ్యాచును అత్యుత్తమంగా ఆడేందుకే ప్రయత్నిస్తారు. అది వారి దేహభాషలోనే ప్రతిబింబిస్తుంది. నిరంతరం వారు సత్ప్రవర్తనతోనే మెలుగుతారు. మైదానంలో అంగీకారయోగ్యం కాని పనులు చేయరు. సొంతగడ్డపై ఆడుతున్న ప్రయోజనం కివీస్‌కు ఉంటుంది. కానీ గతంలో మాకిక్కడ ఆడిన అనుభవం ఉంది. ప్రతి సిరీస్ను మేం తాజాగానే ఆరంభిస్తాం. న్యూజిలాండ్‌లో కివీస్తో పోరు సవాలే. ఐతే మేం అందుకు సిద్ధం. అత్యుత్తమంగా ఆడతాం"
-- విరాట్ కోహ్లీ, టీమిండియా సారథి
రాహుల్‌కే ఓపెనింగ్, కీపింగ్..?
యువ ఆటగాడు కేఎల్ రాహుల్ ఈ మ్యాచ్లో ఓపెనింగ్ బ్యాటింగ్తో పాటు కీపింగ్ చేసే అవకాశముంది. మరో ఓపెనర్ రోహిత్శర్మ ఆస్ట్రేలియాతో జరిగిన చివరి వన్డేలో శతకం బాది తన ఫామ్ను కొనసాగించాడు.
వన్ డౌన్లో విరాట్ కోహ్లీ, మిడిలార్డర్లో శ్రేయస్ అయ్యర్, మనీశ్ పాండే, జడేజా రాణిస్తున్నారు. బౌలర్లలో బుమ్రా, షమి, సైనీ అద్భుత ప్రదర్శన చేశారు. వీరికి తోడుగా శార్దూల్ ఠాకూర్/శివమ్ దూబేలో ఒకరు, స్పిన్నర్లలో కుల్దీప్/చాహల్లో ఒకరు బరిలోకి దిగే అవకాశముంది. ఈ మ్యాచ్లో పంత్, సంజు శాంసన్కు అవకాశం రాకపోవచ్చు. అయితే ఈ మ్యాచ్లో ఆరుగురు బౌలర్ల వ్యూహాన్ని అమలు చేయాలని కోహ్లీ సేన భావిస్తోంది.