దక్షిణాఫ్రికా వేదికగా జరిగిన అండర్-19 వన్డే సిరీస్ను సొంతం చేసుకుంది యువ టీమిండియా. శనివారం జరిగిన రెండో వన్డేలో భారత్ జట్టు 8 వికెట్ల తేడాతో ఘన విజయం సాధించింది. బర్త్డే బాయ్ యశస్వి జైశ్వాల్‌ ఆల్‌రౌండ్ ప్రదర్శనతో జట్టుకు సునాయస విజయాన్ని అందించాడు.
టీ20 మ్యాచ్లానే...
అసలే టీ20 ప్రపంచకప్ ముందు జరుగుతున్న సిరీస్ కావడం వల్ల టీమిండియా కుర్రాళ్లంతా అదే జోష్లో ఉన్నారు. అందుకే సఫారీ జట్టుతో జరిగిన తాజా వన్డే సిరీస్ను పొట్టి ఫార్మాట్లా ముగించేశారు. తొలుత బ్యాటింగ్ చేసిన దక్షిణాఫ్రికా జట్టు 29.5 ఓవర్లలో 119 పరుగులకే ఆలౌట్ అయింది. భారత బౌలింగ్ విభాగంలో యశస్వి జైస్వాల్ 4 వికెట్లు తీశాడు. ఆకాశ్, అథర్వ, రవి బిష్ణోయ్ చెరో రెండేసి వికెట్లు ఖాతాలో వేసుకున్నారు.
120 పరుగుల లక్ష్యాన్ని 2 వికెట్లు కోల్పోయి 16.2 ఓవర్లలోనే ఛేదించింది యువ టీమిండియా. బౌలింగ్లోనే కాకుండా బ్యాటింగ్లోనూ రాణించిన యశస్వి 89 పరుగులు (56 బంతుల్లో; 14 ఫోర్లు, 3 సిక్సర్లు) సాధించి నాటౌట్గా నిలిచాడు. భారత బ్యాట్స్మన్లలో ధ్రువ్ జురెల్‌ 26 పరుగులు చేయగా, కెప్టెన్ ప్రియమ్ గార్గ్‌ డకౌట్ అయ్యాడు.
18వ పుట్టినరోజున 'మ్యాన్ ఆఫ్ ది మ్యాచ్' అందుకున్నాడు యశస్వి జైస్వాల్. ఈ విజయంతో మూడు వన్డేల సిరీస్ను 2-0 తేడాతో సొంతం చేసుకుంది భారత్.
గురువారం జరిగిన తొలి వన్డేలో 9 వికెట్ల తేడాతో దక్షిణాఫ్రికాను చిత్తు చేసింది భారత యువజట్టు. నామమాత్రపు మూడో వన్డే సోమవారం జరుగనుంది. వచ్చే ఏడాదికి గానూ ఇటీవల జరిగిన ఐపీఎల్‌ వేలంలో భారీ ధర పలికాడు యశస్వి. రాజస్థాన్ జట్టు ఇతడిని రూ.2.4 కోట్లకు సొంతం చేసుకుంది.
