చివరి టీ20లో ఇంగ్లాండ్​ చిత్తు.. కోహ్లీ సేనదే సిరీస్​

నిర్ణయాత్మక ఐదో టీ20లో ఇంగ్లాండ్​పై భారత్​ ఘన విజయం సాధించింది. 225 పరుగుల లక్ష్యంతో బరిలోకి దిగిన మోర్గాన్​ సేన.. 188 పరుగులకే చేతులెత్తేసింది. ఇంగ్లాండ్ బ్యాట్స్​మెన్లలో బట్లర్​, మలన్ హాఫ్​ సెంచరీలతో రాణించినప్పటికీ లాభం లేకుండా పోయింది. భారత బౌలర్లలో ఠాకుర్​ 3, భువనేశ్వర్​ 2 వికెట్లు తీసుకున్నారు.

మొతేరా వేదికగా ఇంగ్లాండ్​తో జరిగిన చివరి టీ20లో భారత్ విజయం సాధించింది. 36 పరుగుల తేడాతో గెలుపొందిన కోహ్లీ సేన పొట్టి సిరీస్​ను 3-2 తేడాతో కైవసం చేసుకుంది. టాస్​ ఓడి బ్యాటింగ్​కు దిగిన టీమ్ఇండియా నిర్ణీత ఓవర్లలో 2 వికెట్లు కోల్పోయి ప్రత్యర్థి ముందు 224 పరుగుల లక్ష్యాన్ని నిర్దేశించింది. ఇండియా బ్యాట్స్​మెన్లలో రోహిత్, విరాట్​లు అర్ధసెంచరీలతో రాణించగా.. సూర్యకుమార్ యాదవ్, హార్దిక్​ పాండ్యా విధ్వంసం సృష్టించారు.

కట్టుదిట్టంగా బౌలింగ్​ చేసిన భువనేశ్వర్​ కుమార్​(2/15)కు మ్యాన్​ ఆఫ్​ ది మ్యాచ్​ అవార్డు దక్కింది. విరాట్​ ప్లేయర్​ ఆఫ్​ ది సిరీస్​గా నిలిచాడు.

అనంతరం బ్యాటింగ్​కు దిగిన ఇంగ్లాండ్​ను తొలి ఓవర్లోనే భువీ దెబ్బకొట్టాడు. ఫామ్​లో ఉన్న జేసన్​ రాయ్​ను క్లీన్​ బౌల్డ్​ చేశాడు. తర్వాత క్రీజులోకి వచ్చిన మలన్​.. బట్లర్​తో కలిసి రెండో వికెట్​కు 129 పరుగుల భాగస్వామ్యం నెలకొల్పాడు. వీరిద్దరూ పదికి తగ్గకుండా రన్​రేట్​తో పరుగులు సాధించారు. ఈ క్రమంలోనే మలన్, బట్లర్​లు హాఫ్ సెంచరీలు చేశారు. ఈ జంటను మళ్లీ భువనేశ్వరే​ విడగొట్టాడు.

శార్దుల్​ మళ్లీ బ్రేక్​..

నాలుగో టీ-20లో మ్యాచ్​ను మలుపు తిప్పిన శార్దుల్​ ఠాకుర్​.. ఈ మ్యాచ్​లోనూ 15వ ఓవర్లో బౌలింగ్​కు వచ్చి​ ఇంగ్లాండ్​ను గట్టి దెబ్బకొట్టాడు. ఒకే ఓవర్లో మలన్​తో పాటు బెయిర్​ స్టోను పెవిలియన్​ పంపాడు. బెయిర్​ స్టోను క్యాచ్​ ఔట్​గా వెనక్కిపంపిన ఠాకుర్​.. మలన్​ను క్లీన్​ బౌల్డ్​ చేశాడు. కెప్టెన్ మోర్గాన్​ను తర్వాతి ఓవర్లో హార్దిక్ పాండ్యా పెవిలియన్ చేర్చాడు.

తర్వాత చేయాల్సిన రన్​రేట్​ అమాంతం పెరగడం వల్ల టీమ్​ఇండియా విజయం లాంఛనమే అయింది. ఇప్పటికే 3-1 తేడాతో టెస్టు సిరీస్​ను కోల్పోయిన ఇంగ్లాండ్​.. తాజాగా 3-2తో పొట్టి సిరీస్​ను చేజార్చుకుంది. తదుపరి 3 మ్యాచ్​ల వన్డే సిరీస్​ పుణే వేదికగా మంగళవారం నుంచి ప్రారంభం కానుంది.

ఇదీ చదవండి:తొలి టీ20లో భారత్​పై దక్షిణాఫ్రికా విజయం