టీమ్ఇండియా యువ వికెట్‌కీపర్‌, బ్యాట్స్‌మెన్‌ రిషభ్‌పంత్‌పై ఒత్తిడి లేకుండా వదిలేస్తే మ్యాచ్‌ విన్నర్‌గా నిలుస్తాడని ఓపెనర్ రోహిత్ శర్మ పేర్కొన్నాడు. అందుకు భారత జట్టు కట్టుబడి ఉందని తెలిపాడు. తాజాగా మీడియాతో మాట్లాడిన హిట్‌మ్యాన్‌.. పంత్ గురించి ఎక్కువగా ఆలోచించొద్దని చెప్పాడు. అతడిని ఎంత వదిలేస్తే అంత బాగా రాణిస్తాడని అన్నాడు.
"మేం పంత్ను వదిలేశాం. తనకు ఇష్టమొచ్చినట్లు ఆడడానికి స్వేచ్ఛనిచ్చాం. టీమ్ మేనేజ్‌మెంట్‌ కూడా అందుకు సిద్ధంగా ఉంది. అయితే, మీకొక ప్రశ్న వేయదల్చుకున్నా. మీరు పంత్ గురించి ఆలోచించకుండా ఉంటారా? అతడిని వదిలేస్తారా? అందుకు సిద్ధంగా ఉన్నారా?" అని రోహిత్ మీడియాను అడిగాడు. "అతడిని సహజసిద్ధమైన ఆట ఆడనివ్వండి. గతంలోనూ ఇదే విషయం చెప్పాను. ఇక నుంచి పంత్ వెనక్కి తిరిగి చూసుకోవాల్సిన అవసరం లేదు. ఇప్పటివరకు ఆసీస్‌, ఇంగ్లాండ్‌ జట్లపై మెరుగైన ప్రదర్శన చేశాడు. మీడియా ఒత్తిడి తప్ప పంత్ను మరేదీ ఆపలేదు" అని రోహిత్ ఘాటు వ్యాఖ్యలు చేశాడు.