వచ్చే నెలలో ఆస్ట్రేలియాతో జరగబోయే టెస్టు సిరీస్లో వార్నర్, స్మిత్ ఆడటం భారత్కు సవాలేనని చెప్పాడు భారత బౌలర్ షమి. అయితే గత పర్యటనలానే ఈసారి కూడా తన సహచర పేసర్లు, బ్యాట్స్మెన్ అద్భుతమైన ప్రదర్శన చేస్తారని ధీమా వ్యక్తం చేశాడు.
2018లో జరిగిన బోర్డర్-గావస్కర్ ట్రోఫీలో ఆస్ట్రేలియాపై భారత్ 2-1తేడాతో ఘనవిజయం సాధించింది. ఆ గెలుపు వెనుక టీమ్ఇండియా బౌలర్ల కృషి ఉంది. ఆడిన ఎనిమిది ఇన్నింగ్స్లలో ప్రత్యర్థి జట్టును ఏడుసార్లు ఆలౌట్ చేశారు. జస్ప్రీత్ బుమ్రా (21) ఎక్కువ వికెట్లు పడగొట్టగా, మహ్మద్ షమి (16), ఇషాంత్ శర్మ (11) కూడా తమవంతు పాత్ర పోషించారు.
"మా బౌలర్లలో 140 కిలోమీటర్ల వేగంతో బౌలింగ్ చేయగలిగిన వారు ఉన్నారు. ఆస్ట్రేలియా బ్యాట్స్మెన్ ఎదుర్కొవాలంటే అలాంటి పేసర్లు అవసరం. స్పిన్ బౌలింగ్లోనూ రకరకాల వైవిధ్యాలు కలిగిన వాళ్లు ఉన్నారు. మా నైపుణ్యాలూ భిన్నంగా ఉన్నాయి. అత్యుత్తమ బ్యాట్స్మెన్ కూడా మా జట్టులో ఉన్నారు. ఇరుజట్ల మధ్య మంచి పోటీ ఉంటుంది. గత పర్యటనలోని ప్రతి టెస్టులోనూ దాదాపుగా ప్రత్యర్థిని ఆలౌట్ చేశాం. ఫ్రీడమ్ ట్రోఫీ లేదా పింక్-బాల్ టెస్టులోనూ చాలా ప్రభావంతంగా బౌలింగ్ చేశాం. ఆస్ట్రేలియాతో త్వరలో జరగబోయే టెస్టు సిరీస్లోనూ దీనిని పునరావృతం చేయాలని చూస్తున్నాం"
- మహ్మద్ షమి, టీమ్ఇండియా పేసర్
ఐపీఎల్‌లో సంతృప్తికర ప్రదర్శన వల్ల ఆస్ట్రేలియా పర్యటనపై ఒత్తిడి తొలగిపోయిందని పేర్కొన్నాడు షమి. కంగారూల సొంతగడ్డపై వారినే ఢీకొట్టగల ఆటగాళ్లు భారత్‌లో ఉన్నారని స్పష్టం చేశాడు. పంజాబ్‌ తరఫున ఆడిన షమి.. ఈసారి ఐపీఎల్ 20 వికెట్లు తీశాడు.
