ప్రస్తుత తరంలో టీమ్ఇండియా ఆటగాళ్లు విరాట్ కోహ్లీ, రోహిత్ శర్మలను ఉత్తమ జోడీగా అభివర్ణించాడు శ్రీలంక మాజీ క్రికెటర్ సంగక్కర. వీరిద్దరూ అప్పట్లో గంగూలీ-ద్రవిడ్లను తలపిస్తున్నారని తెలిపాడు. కష్టంతో కూడిన షాట్లను అలవోకగా ఆడుతూ గొప్ప ప్లేయర్లుగా ఎదిగారని కితాబిచ్చాడు.
"మీరు ఒకసారి గంగూలీ, ద్రవిడ్ల బ్యాటింగ్ శైలిని గుర్తు తెచ్చుకుంటే వారిద్దరూ సంప్రదాయ షాట్లను ఆడేవారు. అందువల్ల వారి బ్యాటింగ్ శైలి చాలా సులువుగా అనిపించేది. ద్రవిడ్ కాస్త చూడముచ్చటైన షాట్స్ ఆడేవాడు. ప్రస్తుత తరంలో కోహ్లీ, రోహిత్ అలాంటి సంప్రదాయ షాట్లతో పాటు దూకుడైన ఆటతో రాణిస్తున్నారు. బంతిని బాదాలంటే కేవలం బలం ఉండాల్సిన పనిలేదని.. మంచి టైమింగ్తో ఆడితే సరిపోతుందని వీరిద్దరూ నిరూపిస్తున్నారు."