'సెహ్వాగ్ కన్నా అతడు మంచి ప్లేయర్ కానీ బుర్రలేదు'

పాక్ మాజీ క్రికెటర్​ నజీర్​కు అద్భుతమైన ప్రతిభ ఉన్నా, సరైన ఆలోచన విధానం లేదని అన్నాడు ఆ దేశ మాజీ బౌలర్ షోయబ్ అక్తర్. భారత మాజీ ఆటగాడు సెహ్వాగ్​ను అతడితో పోల్చి ఈ వ్యాఖ్యలు చేశాడు.

పాకిస్థాన్ మాజీ బౌలర్ షోయబ్ అక్తర్.. తమ దేశానికే చెందిన మాజీ ఆటగాడు ఇమ్రాన్ నజీర్​పై వివాదాస్పద వ్యాఖ్యలు చేశాడు. తను భారత్​కు చెందిన సెహ్వాగ్ కంటే ప్రతిభవంతుడైనా, వీరేందర్​కు ఉన్న ఆలోచన విధానం నజీర్​కు లేదని అభిప్రాయపడ్డాడు. ఆ వీడియోను తన యూట్యూబ్​ ఛానెల్​లో పంచుకున్నాడు.

"ఇమ్రాన్ నజీర్​కు ఉన్న టాలెంట్ సెహ్వాగ్​కు లేదు. అయితే సెహ్వాగ్​కు ఉన్న బుర్ర నజీర్​కు లేకుండా పోయింది. తన కెరీర్​ ప్రారంభంలో భారత్​పై మ్యాచ్​ తర్వాత నిలకడగా ఆడాలని సూచించాను. కానీ నా మాటల్ని పట్టించుకోలేదు. దురదృష్టవశాత్తు నజీర్​ సేవల్ని పాక్ ఎక్కువ కాలం వినియోగించుకోలేకపోయింది. అయితే సెహ్వాగ్ కంటే అతడు మంచి ఆటగాడు, ఫీల్డర్" -షోయబ్ అక్తర్, పాక్ మాజీ పేసర్

1999లో పాక్ తరఫున అరంగేట్రం చేసిన ఇమ్రాన్.. భారత్​తో మ్యాచ్​లో విధ్వంసక శతకం బాదాడు. దీంతో అతడు తిరుగులేని బ్యాట్స్​మన్ అవుతాడని ఆ దేశ మాజీ క్రికెటర్లు భావించారు. అయితే కొన్ని నెలల వ్యవధిలో నజీర్ కెరీర్ గాడి తప్పింది. కెరీర్​లో 8 అంతర్జాతీయ టెస్టులు, 79 వన్డేలు, 25 టీ20లు మాత్రమే ఆడి, 2,822 పరుగులు చేశాడు. సెహ్వాగ్ మాత్రం అంతర్జాతీయ క్రికెట్​లో 17,253 పరుగులు చేశాడు.