ప్రపంచ రికార్డులో 'స్పీడ్ ​గన్​' లెక్క తప్పిందా?

అండర్​-19 ప్రపంచకప్​లోని ప్రదర్శనతో శ్రీలంక బౌలర్​ మతీశా పతిరానా వార్తల్లో నిలిచాడు. ప్రపంచంలోనే అత్యంత వేగవంతమైన బంతి విసిరిన బౌలర్​గా అతడి పేరు మార్మోగిపోయింది. అయితే ఇతడు వేసిన ఆ బంతి వేగాన్ని స్పీడ్​ గన్​ తప్పుగా చూపించిందని తెలుస్తోంది. అందుకే ఐసీసీ.. ఈ రికార్డుపై ఎలాంటి ప్రకటన చేయలేదు.

అండర్‌-19 ప్రపంచకప్​లోనిభారత్‌తో జరిగిన మ్యాచ్​లో శ్రీలంక పేసర్ మతీశా పతిరానా గంటకు 175 కి.మీ వేగంతో బంతి వేసి వార్తల్లోకెక్కాడు. టీమిండియా యువ బ్యాట్స్​మన్ యశస్వి జైస్వాల్​ ఈ బంతిని ఎదుర్కొన్నాడు. ఇది వైడ్​ అయినా, బంతి పూర్తయ్యాక స్క్రీన్‌పై నమోదైన వేగం అందర్నీ ఆశ్చర్యపర్చింది. అయితే ఐసీసీ మాత్రం ప్రపంచంలోనే అత్యంత వేగంగా వేసిన బంతిగా ఈ రికార్డును ధ్రువీకరించలేదు. స్పీడ్​గన్‌ పొరపాటు వల్లే ఈ విధంగా జరిగి ఉండొచ్చని సమాచారం. ఫలితంగా వేగవంతమైన బంతి రికార్డు పాక్​ మాజీ క్రికెటర్​ అక్తర్‌ (గంటకు 161.3 కిలోమీటర్లు) పేరిటే ఉంది. 2003 ప్రపంచకప్​లో ఈ వేగాన్ని నమోదు చేశాడు అక్తర్.

జూనియర్​ మలింగకు చోటు ఇలా

మతీశా.. గతంలోనూ మలింగ వారసుడిగా వార్తల్లో నిలిచాడు. అచ్చం లంక సీనియర్​ పేసర్​​ లసిత్​ మలింగను పోలిన బౌలింగ శైలి మాత్రమే కాదు.. తనలాగే పదునైన యార్కర్లు సంధించగలడు​. ఫలితంగానే కళాశాల స్థాయిలో జరిగిన అరంగేట్ర మ్యాచ్​లోనే కేవలం 7 పరుగులిచ్చి 6 వికెట్లు ఖాతాలో వేసుకున్నాడు. గతేడాది సెప్టెంబర్​లో ఈ ప్రదర్శనతో అప్పట్లో పెద్ద సంచలనంగా మారాడు ఈ 17 ఏళ్ల క్రికెటర్​. ఈ ప్రదర్శన తర్వాత అండర్​-19 ప్రపంచకప్​ జట్టులోనూ చోటు దక్కించుకున్నాడు.