క్రికెట్లో మరింత పారదర్శకతను తీసుకొచ్చేందుకు ఐసీసీ సరికొత్త ఆలోచన చేసింది. ప్రపంచమంతా నెట్వర్క్ ఉన్న ఇంటర్పోల్ సహాకారం తీసుకోనుంది. క్రీడాకారుల్ని ప్రలోభపెట్టేందుకు ప్రయత్నించే వారిపై నిఘా పెట్టనుంది.
ఫ్రాన్స్లోని ఇంటర్పోల్ ప్రధాన కార్యాలయాన్ని సందర్శించారు ఐసీసీ అవినీతి నిరోధక విభాగం జనరల్ మేనేజర్ అలెక్స్ మార్షల్. అనంతరం ఈ విషయాన్ని వెల్లడించారు.
'ఐసీసీ, ఇంటర్ పోల్ కలిసి అవినీతిపై పోరాటం చేసేందుకు సిద్ధమవుతున్నాయి. ఇప్పటికే చాలా దేశాల్లోని న్యాయ సంబంధమైన వ్యవస్థలతో సత్సంబంధాలు కలిగి ఉన్నాం. అయితే ఇంటర్ పోల్తో కలవడం వల్ల 194 దేశాల నెట్వర్క్ను అనుసంధానం చేసుకోవచ్చు. ఫలితంగా అవినీతిపరుల గురించి మరింత విస్తృతంగా తెలుసుకోవచ్చు.
-- అలెక్స్ మార్షల్, ఐసీసీ అవినీతి విభాగం
ఆటగాళ్లకు అవగాహన ఏర్పరిచి క్రీడలో అవినీతి, అక్రమాలు తరిమికొట్టడమే లక్ష్యమని వెల్లడించారు అలెక్స్. ఎవరైనా తప్పు చేసినట్లు తేలితే ఆయా దేశాల్లోని ఇంటర్పోల్తో ఆ విషయంపై లోతైన దర్యాప్తు చేపట్టేందుకు అవకాశం ఏర్పడుతుందన్నారు.
'ఆటల ద్వారా సత్సంబంధాలు పెరుగుతాయి. కానీ కొంత మంది దురాశతో చేసే పనులతో ఆటపై నిబద్ధతకు భంగం కలిగిస్తున్నారు. అందుకే ఐసీసీతో కలిశాం. ఇది చాలా మంచి నిర్ణయం.
-- గ్రేసియా, ఇంటర్ పోల్ అసిస్టెంట్ డైరెక్టర్
