ఐసీసీ ర్యాంకింగ్స్​: కోహ్లీ పైపైకి... టాప్​-10లో మయాంక్​

ఐసీసీ మంగళవారం.. టెస్టు ర్యాంకింగ్స్​ జాబితా ప్రకటించింది. ఇందులో కోహ్లీ మరింత మెరుగయ్యాడు. బంగ్లాదేశ్​పై గులాబి టెస్టులో సెంచరీ సాధించిన టీమిండియా సారథి... టాపర్​ స్మిత్​కు మూడు పాయింట్ల దూరంలో నిలిచాడు. అరంగేట్రంలోనే ద్విశతకంతో ఆకట్టుకున్న మయాంక్..​ టాప్​-10లో స్థానం సంపాదించుకున్నాడు.

ఆసీస్​ సీనియర్​ బ్యాట్స్​మన్​ స్టీవ్​ స్మిత్​, టీమిండియా సారథి విరాట్​ కోహ్లీ.. టెస్టు ర్యాంకింగ్స్​లో అగ్రస్థానం కోసం పోటీ పడుతున్నారు. ఇటీవల జరిగిన డే/నైట్​ టెస్టులో 136 పరుగులు కొట్టిన విరాట్​... తాజా ర్యాంకింగ్స్​లో మరింత పైకి ఎగబాకాడు. ఇటీవల ప్రదర్శనతో 22 పాయింట్లు మెరుగుపరచుకొని ప్రస్తుతం 928 పాయింట్లతో ఉన్నాడు.స్మిత్​(931 పాయింట్లతో) తొలిస్థానంలో ఉన్నాడు. వీరిద్దరి మధ్య అంతరం మూడు పాయింట్లు మాత్రమే.

అగర్వాల్​ అదరహో...

మరో భారత క్రికెటర్ మయాంక్​ అగర్వాల్..​ర్యాంకింగ్స్​లో తొలిసారి టాప్​-10లో చోటు దక్కించుకున్నాడు. ఇండోర్​లో బంగ్లాదేశ్​తో జరిగిన తొలి టెస్టులో ద్విశతకం సాధించాడు మయాంక్​​. ఈ ప్రదర్శనతో ఒక్కసారిగా 700 పాయింట్ల ఎగబాకి టాప్​-10లో చోటు సంపాదించుకున్నాడు. ప్రస్తుతం మొదటి 10 స్థానాల్లో నలుగురు భారతీయులే ఉండటం విశేషం. చతేశ్వర్​ పుజారా(791), అజింక్య రహానే(759) నాలుగు, ఐదు స్థానాల్లో ఉన్నారు.