క్రికెట్లో ఫిబ్రవరి నెలకు గానూ 'ప్లేయర్ ఆఫ్ ది మంత్' అవార్డుకు నామినేట్ అయిన ఆటగాళ్ల జాబితాను అంతర్జాతీయ క్రికెట్ మండలి (ఐసీసీ) ప్రకటించింది. పురుషుల క్రికెటర్లలో టీమ్ఇండియా స్పిన్నర్ రవిచంద్రన్ అశ్విన్, ఇంగ్లాండ్ కెప్టెన్ జో రూట్, వెస్టిండీస్ బ్యాట్స్మన్ కైలీ మేయర్స్ ఉన్నారు.
ఇంగ్లాండ్పై టెస్టు సిరీస్లో అద్భుతంగా రాణిస్తున్నాడు అశ్విన్. ఇప్పటివరకు జరిగిన 3 టెస్టుల్లో 176 పరుగులు చేయటం సహా 24 వికెట్లు పడగొట్టాడు. చెపాక్ వేదికగా జరిగిన రెండో టెస్టులో సెంచరీతో టీమ్ఇండియా విజయానికి బాటలు వేశాడు.
భారత్తో తొలి టెస్టులో ద్విశతకం(218) సాధించాడు రూట్. అహ్మదాబాద్ వేదికగా జరిగిన పింక్-టెస్టులో 5 వికెట్లు పడగొట్టాడు. ఈ సిరీస్లో ఇప్పటివరకు జరిగిన మూడు టెస్టుల్లో రూట్.. 333 రన్స్ చేసి, 6 వికెట్లను సాధించాడు.
మరోవైపు మేయర్స్ అరంగేట్రంలోనే టెస్టు నాలుగో ఇన్నింగ్స్లో 210 పరుగులతో అజేయంగా నిలిచి.. బంగ్లాపై చారిత్రక విజయాన్నందించాడు.