ఆ దెబ్బకు కాఫీ తాగడం పూర్తిగా మానేసిన హార్దిక్

'కాఫీ విత్ కరణ్' టీవీ షోకు వెళ్లి వచ్చిన తర్వాత నుంచి తాను కాఫీ తాగడం పూర్తిగా మానేశానని చెప్పాడు హార్దిక్ పాండ్య. తాజాగా జరిగిన ఇన్​స్టా లైవ్​ చాట్​లో ఈ విషయాన్ని పంచుకున్నాడు.

ఓ కప్పు కాఫీ తన జీవితాన్ని మార్చేసిందని చెప్పాడు టీమిండియా ఆల్​రౌండర్ హార్దిక్ పాండ్య. అందుకే అప్పటి నుంచి కాఫీ బదులుగా గ్రీన్ టీ మాత్రమే తాగుతున్నానని అన్నాడు. భారత క్రికెటర్ దినేశ్ కార్తిక్​తో ఇటీవలే జరిగిన ఇన్​స్టా లైవ్​చాట్​లో ఈ ఆసక్తికర విషయాన్ని పంచుకున్నాడు.

"కాఫీ విత్ కరణ్​' షోకు వెళ్లి వచ్చిన తర్వాత, కాఫీ తాగడం పూర్తిగా మానేశా. ఇప్పుడు గ్రీన్ టీ మాత్రమే తాగుతున్నా. నా జీవితంలో కాఫీ ఒక్కసారి తాగినందుకే భారీ మూల్యం చెల్లించుకున్నా. స్టార్​బక్స్ కంటే ఇదే ఖరీదైన కాఫీ అని నేను పందెం కూడా వేస్తా" -హార్దిక్ పాండ్య, భారత క్రికెటర్

గతంలో ఈ టీవీ షోకు, మరో క్రికెటర్​ కేఎల్ రాహుల్​తో కలిసి హాజరైన హార్దిక్.. మహిళలపై చేసిన వ్యాఖ్యలు అప్పట్లో తీవ్ర దూమారం రేపాయి. వీరిద్దరిని క్రికెట్ ఆడకుండా, కొన్నాళ్ల పాటు బీసీసీఐ నిషేధించింది.

ఈ విషయంతో పాటే ఐపీఎల్ గురించి మాట్లాడిన హార్దిక్.. ప్రేక్షకుల్లేకుండా టోర్నీ నిర్వహిస్తే, ఆడేందుకు తాను సిద్ధమని చెప్పాడు. ఒకవేళ ఇలానే జరిగితే అద్భుత ఆలోచన అవుతుందని అన్నాడు. ఇంట్లో ఉండైనా సరే ప్రజలు ఆనందం పొందుతారనే అభిప్రాయం వ్యక్తం చేశాడు.