రిటైర్మెంట్​పై​ విధ్వంసక క్రిస్ గేల్ స్పందన

తనకు ఇప్పట్లో వీడ్కోలు పలికే ఆలోచన లేదని క్రిస్ గేల్ చెప్పాడు. అతడు ఈ విషయాన్ని వెల్లడించాడని, ఈఎస్​పీఎన్ క్రిక్ ఇన్ఫో సంస్థ పేర్కొంది.

వెస్టిండీస్‌ విధ్వంసకర బ్యాట్స్‌మన్‌, యూనివర్సల్ బాస్‌ క్రిస్‌గేల్‌కు ఇప్పట్లో రిటరయ్యే ఆలోచన లేదని తెలుస్తోంది. తాను ఆడితే చూడాలని చాలా మంది అభిమానులు ఆశిస్తున్నారని, తనకూ క్రికెట్‌పై ఇంకా ఇష్టం పోలేదని అన్నాడు. ఈఎస్‌పీఎన్‌ క్రిక్‌ ఇన్ఫో ఈ విషయాన్ని వెల్లడించింది.

"నేనింకా ప్రపంచవ్యాప్తంగా అనేక లీగ్‌ మ్యాచ్‌లు ఆడుతున్నా. ఎందుకంటే ఆటకు నేను చేయాల్సింది చాలా ఉందని నా నమ్మకం. అందుకు నా శరీరమూ సహకరిస్తుంది. రోజులు గడిచేకొద్ది నేను యవ్వనంగా మారుతున్నానని నాకు స్పష్టంగా తెలుస్తోంది" -క్రిస్ గేల్, విండీస్​ క్రికెటర్

ఈ సందర్భంగా గేల్‌ తన రిటైర్మెంట్‌పై స్పందించాడు. 45 ఏళ్ల వరకు కొనసాగితే బాగుంటుందని, 45 అనేది మంచి సంఖ్య అని జోక్‌ చేశాడు. ఈ ఏడాది అక్టోబర్‌లో ఆస్ట్రేలియాలో టీ20 ప్రపంచకప్‌ ఆడేందుకు సిద్ధంగా ఉన్నానన్నాడు.

వెస్టిండీస్​ క్రికెటర్ క్రిస్ గేల్

"పొట్టి ప్రపంచకప్‌లో ఆడితే బాగుంటుంది. అందుకు తలుపులు తెరిచి ఉన్నాయి. ఏం జరుగుతుందో వేచి చూద్దాం. నాకన్నా ప్రతిభవంతులైన యువ క్రికెటర్లు కొంత మంది ఉన్నారు. ఈ విషయాన్ని సెలెక్టర్లకే వదిలేస్తున్నా" -క్రిస్ గేల్‌, విండీస్ బ్యాట్స్​మన్