సచిన్ వల్లే మళ్లీ జట్టులోకి వచ్చా: యువీ

కేన్సర్​తో పోరాడి తిరిగి క్రికెట్​లో అడుగుపెట్టేందుకు సచిన్​ తనకు స్ఫూర్తిగా నిలుస్తూ వచ్చాడని భారత మాజీ ఆల్​రౌండర్​ యువరాజ్​ సింగ్​ అన్నాడు. ఇటీవలే ఓ మీడియాకు ఇచ్చిన ఇంటర్వ్యూలో మాట్లాడుతూ.. ఈ విషయాలు పంచుకున్నాడు.

టీమ్​ఇండియా మాజీ ఆల్​రౌండర్​ యువరాజ్​ సింగ్​ ఆట గురించి ప్రత్యేకంగా చెప్పనక్కర్లేదు. మైదానంలో అతడు అడుగుపెడుతున్నాడంటే చాలు.. క్రికెట్​ అభిమానుల అంచనాలు పెరిగిపోతాయి. అయితే, తను కేన్సర్​ నుంచి కోలుకుని.. తిరిగి ఆటలో అడుగుపెట్టేందుకు లిటిల్​ మాస్టర్​ సచిన్​ తెందూల్కర్ ఎంతో స్ఫూర్తి నింపినట్లు తెలిపాడు. ఇటీవలే ఓ మీడియాకు ఇచ్చిన ఇంటర్వ్యూలో మాట్లాడుతూ.. పలు ఆసక్తికర విషయాలు పంచుకున్నాడు యువీ.

తన కెరీర్​ చివర్లో అంతర్జాతీయ క్రికెట్​కు దూరంగా ఉన్నాడు యువీ. ఆ తర్వాత జాతీయ క్రికెట్​కు తిరిగి వచ్చి.. మూడేళ్లకుపైగా జట్టులో కొనసాగాడు. అయితే, ఆ సమయంలో ఎన్నో హెచ్చుతగ్గులొచ్చాయని.. సచిన్​ తనలో వాటిని ఎదుర్కొనే ధైర్యాన్ని నింపినట్లు పేర్కొన్నాడు.

"నాకు కెరీర్​లో కొన్ని ఎత్తుపల్లాలు ఉన్నాయి. ఆ సమయంలో నేను సచిన్​తో మాట్లాడేవాడిని. అతను ఒకసారి ఏమన్నాడంటే.. 'మనం ఎందుకు క్రికెట్​ ఆడతాం?. అవును.. ఎవరైనా అంతర్జాతీయ స్థాయిలో ఆడాలనుకుంటారు. కానీ ఏదైనా ప్రేమతో ఆడాలి. నేను నీ పరిస్థితుల్లో ఉంటే ఏం చేస్తానో తెలియదు. అయితే, నువ్వు ఒకవేళ ఆటను నిజంగానే ఇష్టపడితే.. ఇప్పుడు కూడా మైదానంలో బ్యాట్​ పట్టగలవు. అలాగే ఎప్పుడు రిటైర్​ అవ్వాలో నువ్వే నిర్ణయించుకో. ఇంకొకరికి ఆ అవకాశం ఇవ్వకు.' అని సచిన్ చెప్పాడు."

-యువరాజ్​ సింగ్​, టీమ్​ఇండియా మాజీ క్రికెటర్​

కేన్సర్ చికిత్స తర్వాత తన శరీరం ఇంతకుముందులా ఉండేది కాదని చెప్పాడు యువరాజ్​. అయినప్పటికీ.. అవేవీ పట్టించుకోకుండా ముందుకు సాగినట్లు తెలిపాడు. "సచిన్​తో చాలా మంచి స్నేహం ఏర్పడింది. 3,4 ఏళ్లు జాతీయ క్రికెట్​ ఆడా. టీ20 ప్రపంచ కప్​లోనూ పాల్గొన్నా. ఇకపై నా జీవితంలో సంతోషంగా, ప్రశాంతంగా ఉండాలనుకుంటున్నా. ఇప్పుడు నాకెలాంటి విచారం లేదు." అని యువీ పేర్కొన్నాడు.

యువరాజ్​ తన కెరీర్​ మొత్తంలో 304 వన్డేలు ఆడగా.. 8,701 పరుగులు చేశాడు. 2007 టీ20 ప్రపంచకప్​, 2011 వన్డే ప్రపంచ కప్​ సాధించడంలోనూ యువీ కీలకపాత్ర పోషించాడు. 2011 ప్రపంచ్​ కప్​లో ప్లేయర్​ ఆఫ్​ ది టోర్నమెంట్​గా​నూ నిలిచాడు.