హైదరాబాద్ క్రికెట్ సంఘం (హెచ్‌సీఏ) అధ్యక్షుడు మహ్మద్ అజహరుద్దీన్ మాట నెగ్గించుకున్నారు. హెచ్‌సీఏ అంబుడ్స్మన్గా జస్టిస్ దీపక్వర్మను నియమించారు. ఆదివారం ఉప్పల్‌ స్టేడియంలో జరిగిన వార్షిక సర్వసభ్య సమావేశం (ఏజీఎం)లో దీపక్‌వర్మ నియామకానికి ఆమోదముద్ర లభించింది. మార్చి 28 నాటి ఏజీఎంకు కొనసాగింపుగా ఆదివారం నిర్వహించిన సమావేశం కూడా రసాభాసగా ముగిసింది.
జస్టిస్ దీపక్‌వర్మ నియామకం విషయంలో తెలంగాణ హైకోర్టు విజయానంద్‌కు రూ.25,000 జరిమానా విధించిన నేపథ్యంలో వేదికపై కూర్చునే అర్హత కార్యదర్శికి లేదంటూ సభ్యులు పెద్ద ఎత్తున నినాదాలు చేశారు. ఎపెక్స్‌ కౌన్సిల్‌ సమావేశంలో దీపక్‌వర్మ నియామకాన్ని సమర్థించి ఇప్పుడు వ్యతిరేకిస్తున్న విజయానంద్‌, ఉపాధ్యక్షుడు జాన్‌ మనోజ్‌, సంయుక్త కార్యదర్శి నరేశ్‌శర్మ, కోశాధికారి సురేందర్‌ అగర్వాల్‌ తక్షణం రాజీనామా చేయాలంటూ డిమాండ్‌ చేశారు.