టీమిండియా కెప్టెన్ కోహ్లీ.. కెరీర్ ప్రారంభంలో దూకుడుగా ఉండేవాడు. తనను కవ్వించే ప్రత్యర్థి ఆటగాళ్లతో అదే విధంగా వ్యవహరించేవాడు. అయితే 2014లో టెస్టు పగ్గాలు అందుకున్న తర్వాత నుంచి ఆ స్వభావాన్ని మార్చుకుంటూ వచ్చాడు. అయితే తనలోని ఈ మార్పులకు భార్య అనుష్క శర్మనే కారణమని చెప్పాడు. మంగళవారం జరిగిన ఆన్లైన్ చాట్ సెషన్స్లో ఈ ఆసక్తికర విషయాన్ని వెల్లడించాడు.
"నా ఓపిక విషయంలో క్రెడిట్ మొత్తం అనుష్కకే దక్కుతుంది. ఆమెతో పరిచయం నాలో చాలా మార్పులు తీసుకొచ్చింది. తన వ్యక్తిత్వం, పరిస్థితుల్ని డీల్ చేసే విధానాల్ని చూసి ప్రశాంతంగా, సహనంగా ఎలా ఉండాలో నేర్చుకున్నా" -కోహ్లీ, టీమిండియా కెప్టెన్
విరాట్ కోహ్లీ-అనుష్క శర్మ
దీనితో పాటే తన కెరీర్ ప్రారంభంలో ఎదురైన సంఘటన గురించి చెప్పాడు విరాట్. బాగా ఆడినా, తొలిసారి రాష్ట్ర జట్టుకు ఎంపిక కాకపోవడం చాలా బాధించిందని చెప్పాడు. ఆ రోజు రాత్రి 3 గంటల వరకు ఏడుస్తూనే కూర్చున్నానని వెల్లడించాడు.
2006లో దిల్లీ తరఫున అరంగేట్రం చేసిన కోహ్లీ.. 2008లో అంతర్జాతీయ క్రికెట్లోకి అడుగుపెట్టాడు. ఆ తర్వాత అంచెలంచెలుగా ఎదిగి, ప్రస్తుతం టీమిండియాకు సారథిగా బాధ్యతలు నిర్వర్తిస్తున్నాడు. ఇప్పటివరకు 86 టెస్టుల్లో 7240 పరుగులు, 248 వన్డేల్లో 11867 పరుగులు, 82 టీ20ల్లో 2794 పరుగులు చేసి లెక్కలేనన్ని రికార్డులను నమోదు చేశాడు.
భారత్లో లాక్డౌన్ విధించడం వల్ల ప్రస్తుతం ఇంట్లోనే ఉన్న కోహ్లీ-అనుష్క.. పలు రకాల వీడియోలను పోస్ట్ చేసి అభిమానుల్ని అలరిస్తున్నారు.
