టీమ్ఇండియాతో 2001లో జరిగిన టెస్టు సిరీస్ తాము పరాజయానికి ప్రధాన కారణంగా స్పిన్నర్ హర్భజన్ సింగ్ అని ఆస్ట్రేలియా మాజీ కెప్టెన్ స్టీవ్ వా అన్నాడు. అతడి అదనపు స్పిన్‌, బౌన్స్‌కు తమ వద్ద జవాబే లేదని చెప్పాడు. భజ్జీ సంప్రదాయ స్పిన్నర్ కాదని, భిన్నమైన వాడని ప్రశంసించాడు. ఒక ఇంటర్వ్యూలో స్టీవ్‌వా 2001 సిరీస్ గురించి మాట్లాడాడు.
"2001లో టీమ్‌ఇండియాకు సిరీస్ అందించింది హర్భజన్ సింగ్. మూడు టెస్టుల్లో 32 వికెట్లు తీసుకున్నాడు. అతడి బౌన్స్‌కు మా వద్ద జవాబే లేదు. లెంగ్త్‌కు తోడుగా అద్భుతమైన బౌన్స్‌ అతడి సొంతం. ప్రతి స్పెల్‌లో అతడు మాపై ఆధిపత్యం చెలాయించాడు. అతడికి మంచి స్ట్రైక్‌రేట్‌ ఉంది. ఎన్ని ఓవర్లు బౌలింగ్ చేసినా నిలకడ కోల్పోయేవాడు కాదు. భజ్జీని హెడేన్‌ బాగానే ఎదుర్కొన్నా మిగతా జట్టు విఫలమైంది. అతడే లేకుంటే మేం సిరీస్ గెలిచేవాళ్లం. మాపై అతడికి మెరుగైన రికార్డుంది"
- స్టీవ్ వా, ఆస్ట్రేలియా మాజీ సారథి