'నేను అనుష్కపై అనుచిత వ్యాఖ్యలు చేయలేదు'

కింగ్స్ ఎలెవన్ పంజాబ్​తో జరిగిన మ్యాచ్​లో కోహ్లీ బ్యాటింగ్​లో విఫలమయ్యాడు. కామెంటరీ బాక్స్​లో ఉన్న గావస్కర్.. కోహ్లీ భార్య అనుష్కపై కొన్ని వ్యాఖ్యలు చేశాడు. దీనిపై మండిపడింది అనుష్క. తాజాగా ఈ విషయంపై క్లారిటీ ఇచ్చాడు గావస్కర్.

రాయల్​ ఛాలెంజర్స్​ బెంగళూరు కెప్టెన్​ విరాట్​ కోహ్లీ, అతని భార్య అనుష్క శర్మపై మాజీ క్రికెటర్ సునీల్​ గావస్కర్​ చేసిన వ్యాఖ్యలు వివాదాస్పదంగా మారాయి. దీనిపై స్పందించిన అనుష్క శర్మ.. ఇవి అభ్యంతరకరంగా ఉన్నాయని చెప్పింది. గావస్కర్​ వివరణ ఇవ్వాల్సిందిగా ఇన్​స్టా​లో పోస్ట్​ పెట్టింది. తాజాగా తన వ్యాఖ్యలపై క్లారిటీ ఇచ్చాడు గావస్కర్. తాను అనుష్కపై ఎలాంటి కామెంట్లు చేయలేదని వెల్లడించాడు.

"నేను అనుష్కను ఎక్కడా నిందించలేదు. అనుష్క.. విరాట్​కు బౌలింగ్ చేస్తున్న సమయంలోని వీడియోపై మాట్లాడానంతే. విరాట్​ లాక్​డౌన్ సమయంలో అనుష్క బౌలింగ్ మాత్రమే ఎదుర్కొన్నాడని చెప్పా. అది ఒక టెన్నిస్ బంతి ఆట. అందువల్ల కోహ్లీతో పాటు ఇతర ఆటగాళ్లు లాక్​డౌన్​లో అంతగా ప్రాక్టీస్ చేయలేదనే ఉద్దేశంతో వ్యాఖ్యలు చేశా. ఇందులో తప్పుగా తీసుకోవాల్సి ఏముంది."

-గావస్కర్, టీమ్​ఇండియా మాజీ క్రికెటర్

అయితే సోషల్ మీడియాలో దీనిపై పలు కామెంట్లు చేశారు ఫ్యాన్స్. దీంతో ఆగ్రహించిన అనుష్క.. గావస్కర్​పై మండిపడింది. 'క్రికెట్​లోకి తననెందుకు లాగుతున్నారు' అంటూ ఆగ్రహం వ్యక్తం చేసింది.

"హలో మిస్టర్​ గావస్కర్,​ మీ వ్యాఖ్యలు ఎంతో అవమానకరమైనవి. ఓ ఆటగాడి ప్రదర్శన ఆధారంగా అతడి భార్యపై ఆరోపణలు చేశారు? దీనిపై మీ నుంచి నాకు వివరణ కావాలి. గత కొన్నేళ్లుగా క్రికెటర్ల వ్యక్తిగత జీవితాల గురించి మాట్లాడటం నేను గమనిస్తూనే ఉన్నాను. ప్రతి ఒక్కరికీ సమాన గౌరవం ఇవ్వాలని మీకు తెలియదా? నా భర్త ఆట గురించి మాట్లాడేందుకు మీరు సిద్ధమేనని తెలుసు. కానీ, అప్పుడు నా పేరు ఉపయోగించాల్సిన అవసరం ఎందుకొచ్చిందో నాకు తెలియాలి" అంటూ గావస్కర్​ను వివరణ కోరింది అనుష్క.

గావస్కర్​కు అనుష్క సందేశం