జట్టుతోనే సిడ్నీకి 'ఐసోలేషన్​ ఆటగాళ్లు'

బయో బుడగ నిబంధనలు ఉల్లంఘించారని వచ్చిన ఆరోపణల నేపథ్యంలోనూ ఐదుగురు ఆటగాళ్లు భారత జట్టుతోనే సిడ్నీకి బయల్దేరనున్నారు. ఆస్ట్రేలియాతో మూడో టెస్టు కోసం సోమవారం మధ్యాహ్నం వీరు జట్టుతో కలిసి ఒకే విమానంలో సిడ్నీకి వెళతారు.

ఆస్ట్రేలియాతో జరగనున్న మూడో టెస్టు కోసం భారత జట్టు ఆటగాళ్లు సోమవారం.. సిడ్నీకి బయలుదేరనున్నారు. ఈ విమానంలోనే.. ఐసోలేషన్​లో ఉన్న ఐదుగురు ఆటగాళ్లూ సిడ్నీకి వెళ్లనున్నారు.

వైస్​ కెప్టెన్ రోహిత్ శర్మ, శుభమన్ గిల్, రిషబ్ పంత్, పేసర్ నవ్​దీప్ సైనీ, పృథ్వీ షా.. బయో బుడగ నిబంధనలు ఉల్లంఘించారని తెలియడం వల్ల వీరు మూడో టెస్టు ఆడటం అనుమానంగా మారింది. కానీ ఎట్టకేలకు వీరు కూడా జట్టుతోనే సిడ్నీకి వెళుతుండటం వల్ల ఈ మ్యాచ్​లో ఆడతారని స్పష్టత వచ్చినట్లైంది.

ఐదుగురు ఆటగాళ్ల విషయంలో దర్యాప్తు చేపడుతున్నామని క్రికెట్ ఆస్ట్రేలియా పేర్కొంది. బీసీసీఐ కూడా ఈ దర్యాప్తునకు సహకరిస్తోందని తెలిపింది. అయితే.. క్రికెట్ ఆస్ట్రేలియా దీన్ని ఉల్లంఘనగా పరిగణించలేదని బీసీసీఐ సీనియర్ అధికారి పేర్కొన్నారు. సోమవారం మధ్యాహ్నం భారత జట్టుతోనే ఈ ఐదుగురు ఆటగాళ్లూ ప్రయాణిస్తారని వెల్లడించారు.

ఇదీ చదవండి:కొవిడ్​ నిబంధనలు అతిక్రమించిన కోహ్లీ, పాండ్యా!