క్రికెట్లో లెగ్ బిఫోర్ వికెట్ (ఎల్బీడబ్ల్యూ) నిర్ణయానికి సంబంధించి సమీక్ష కోసం 'అంపైర్ కాల్'ను తొలగించాలని అభిప్రాయపడ్డాడు టీమ్ఇండియా స్పిన్నర్ హర్భజన్సింగ్. ఈ విషయంపై దిగ్గజ క్రికెటర్ సచిన్ అంతర్జాతీయ క్రికెట్ మండలి(ఐసీసీ)కి విజ్ఞప్తి చేయగా.. మాస్టర్కు మద్దతిస్తూ ట్వీట్ చేశాడు భజ్జీ. క్రికెట్ మరింత సులభతరం కావడానికి దీనితో పాటు మరికొన్ని నిబంధనలు పొందుపర్చాల్సిన అవసరం ఉందని తెలిపాడు.
"సచిన్ చెప్పినదానిని నేను వేయి శాతం అంగీకరిస్తున్నా. బంతి స్టంప్స్ను తాకి వెళ్లినా.. దాన్ని ఔట్గా పరిగణించాలి. స్టంప్స్ను 50 శాతానికి పైగా టచ్ అవ్వకపోయినా.. తాకుతూ వెళ్లినా ఔట్గా ప్రకటించాలి. క్రికెట్ నియమాలలో మార్చాల్సిన రూల్స్లో ఇదే మొదటిది".
- హర్భజన్ సింగ్, టీమ్ఇండియా స్పిన్నర్
బంతి వికెట్కు తాకడంపై నిబంధనలు మార్చాల్సిన అవసరం ఉందని సచిన్ ఇటీవలే తన ట్విట్టర్లో అభిప్రాయాన్ని తెలియజేశాడు. "బంతి ఎంత శాతం స్టంప్స్ను తాకుతుందన్నది అనవసరం. డీఆర్ఎస్లో బంతి స్టంప్స్ను కొద్దిగా తాకుతున్నట్లు కనిపించినా బ్యాట్స్మన్ను ఔట్గా ప్రకటించాల్సిందే. ఆన్ఫీల్డ్ అంపైర్ బ్యాట్స్మన్ను నాటౌట్గా ప్రకటించినా అతడి నిర్ణయాన్ని సవరించి ఔటివ్వాలి. ప్రస్తుతం డీఆర్ఎస్లో భాగంగా బంతి 50 శాతానికి పైగా స్టంప్స్ను తాకినప్పుడే ఆన్ఫీల్డ్ అంపైర్ నిర్ణయాన్ని సవరిస్తున్నారు. అది సరికాదు". అని సచిన్ వెల్లడించాడు.
ఎల్బీడబ్ల్యూ డీఆర్ఎస్ సిస్టమ్
ఎల్బీడబ్ల్యూకు అంపైర్ కాల్ను తొలగించాలని చాలా మంది మాజీ ఆటగాళ్లు సిఫార్సు చేశారు. క్రికెట్లో కొన్ని నిబంధనలను మార్చాలని అంతర్జాతీయ క్రికెట్ మండలి(ఐసీసీ) నిశ్చయించింది. కరోనా వైరస్ కారణంగా టెస్టు మ్యాచ్ల్లో న్యూట్రల్ అంపైర్లు నియమించడం వల్ల జట్లకు అదనపు సమీక్ష తీసుకునే అవకాశాన్ని కల్పించారు. ఈ నిబంధన వల్ల ప్రతి ఇన్నింగ్స్లో జట్లు గరిష్ఠంగా మూడుసార్లు సమీక్షకు వెళ్లొచ్చు.
