సిడ్నీ వేదికగా ఆస్ట్రేలియాతో జరిగిన రెండు వన్డేల్లోనూ టీమ్ఇండియా పరాజయాన్ని ఎదుర్కొంది. మూడు వన్డేల సిరీస్లో రెండింటిలో ఓడి.. కోహ్లీసేన సిరీస్ను చేజార్చుకుంది. జరిగిన రెండు మ్యాచ్ల్లోనూ కంగారూలు ఆల్రౌండ్ ప్రదర్శన చేసి ఆకట్టుకున్నారు. ఆసీస్ బౌలర్లను ఎదుర్కోవడం సహా వారి బ్యాట్స్మెన్ను కట్టడి చేయడంలో భారత బౌలర్ల విఫలమయ్యారు. దీంతో కోహ్లీసేనపై నెట్టింట విమర్శలు వెల్లువెత్తుతున్నాయి.
ఆస్ట్రేలియాతో రెండో వన్డేలో కోహ్లీ బ్యాటింగ్లో పర్వాలేదనిపించినా.. కెప్టెన్గా పూర్తిగా విఫలమయ్యాడని నెటిజన్లు అంటున్నారు. కోచ్ రవిశాస్త్రి నేతృత్వంతో పాటు కోహ్లీ నాయకత్వంలోని టీమ్ఇండియా జట్టు పూర్తిగా విఫలమయ్యిందని అభిప్రాయపడుతున్నారు. భారత జట్టులో నాయకత్వ మార్పు కావాలని అభిమానులు కోరుతున్నారు. ఇప్పటికైనా టీ20 పగ్గాలను రోహిత్శర్మకు అప్పగించాలని బీసీసీఐని డిమాండ్ చేస్తున్నారు.