ఐపీఎల్​లో కోహ్లీ, ధోనీ నా టార్గెట్: ​కుల్దీప్

లాక్​డౌన్​ తర్వాత ఐపీఎల్​ కోసం మళ్లీ మైదానంలో అడుగుపెట్టడం ఎంతో సంతోషంగా ఉందని తెలిపాడు కోల్​కతా నైట్​ రైడర్స్​ ఆటగాడు కుల్దీప్​ యాదవ్​. ఈ మెగాలీగ్​లో కోహ్లీ, ధోనీ లాంటి ఆటగాళ్లను లక్ష్యం చేసుకుని ​తన సామర్థ్యం నిరూపించుకుంటానని ధీమా వ్యక్తం చేశాడు. ఇందుకోసం తాను ఎంతగానో ప్రాక్టీస్​ చేసినట్లు చెప్పాడు. తాజాగా ఈటీవీ భారత్​తో ముచ్చటించిన కుల్దీప్ పలు విషయాలు పంచుకున్నాడు.

లాక్​డౌన్​తో ఇంతకాలం ఇంటికే పరిమితమైన భారత క్రికెటర్లు... ఐపీఎల్​ 13వ సీజన్​తో మళ్లీ మైదానంలోకి అడుగుపెట్టనున్నారు. దుబాయ్​ వేదికగా సెప్టెంబరు 19 నుంచి నవంబరు 10 వరకు బయోసెక్యూర్​ వాతావరణంలో లీగ్ జరగనుంది. ఇప్పటికే జట్లన్నీ యూఏఈకి చేరుకున్నాయి. ఈ నేపథ్యంలో కోల్​కతా నైట్ రైడర్స్​కు​ ప్రాతినిధ్యం వహిస్తోన్న స్పిన్నర్ కుల్దీప్​ యాదవ్​తో ఈటీవీ భారత్ ఎక్స్​క్లూజివ్​ ఇంటర్వ్యూ మీకోసం.

లాక్​డౌన్​ తర్వాత మళ్లీ క్రికెట్​ ఆడబోతుండటం ఎలా ఉంది?

లాక్​డౌన్​ తర్వాత మళ్లీ మైదానంలో అడుగుపెట్టడం ఎంతో సంతోషంగా ఉంది. లాక్​డౌన్ సమయం ఎంతో కష్టతరంగా గడిచింది. చాలా మంది ఎన్నో పెద్ద సమస్యలను ఎదుర్కొన్నారు. అవుట్​డోర్​ ప్రాక్టీస్​ సెషన్​, బౌలింగ్​ వేయడాన్ని ఎంతగానో మిస్​ అయ్యా. అయినప్పటికీ ఫిట్​నెస్​పై దృష్టి సారించి ఇండోర్​ ప్రాక్టీస్​ చేశా.

లాక్​డౌన్​లో మీ ఫిట్​నెస్​ను ఎలా కాపాడుకున్నారు?

ముందుగా నా డైట్​ కంట్రోల్​ చేశా. ఆహారపు అలవాట్లను నియంత్రణలో ఉంచుకుని.. అనంతరం డైట్​ పాటించాలని నా కోచ్​ ఓ సారి చెప్పాడు. ఉదయం, సాయంత్రం కసరత్తులు చేసి ఫిట్​నెస్​పై బాగా దృష్టి సారించా. మొత్తంగా ఈ లాక్​డౌన్​ సమయాన్ని నా శరీరదారుఢ్యం కోసం వెచ్చించడం సంతోషంగా ఉంది.

కుల్దీప్​ యాదవ్​

ఐపీఎల్​ కోసం ఎలా సన్నద్ధమయ్యారు?

లాక్​డౌన్​ తర్వాత పునఃప్రారంభమైన క్రికెట్​లో ఇంగ్లాండ్​, పాక్​, వెస్టిండీస్​ జట్లు తప్ప మరెవరు ఇంతవరకు ​ ఆడలేదు. మిగితా ఆటగాళ్లు ఎలా ప్రాక్టీస్​ చేశారో నాకైతే తెలియదు గానీ నేనైతే బాగానే ప్రాక్టీస్ చేశా. ఈ ఐపీఎల్​లో బాగా ఆడతానని భావిస్తున్నా.

గత సీజన్​లో మీరు బాగా ఆడలేదని అంటున్నారు. ఆ ప్రభావం మీపై పడిందా?

అలాంటి ఒత్తిడి ఏమి లేదు. క్రికెటర్ల కెరీర్​లో ఎత్తుపల్లాలు సహజమే. గ్రాఫ్​ తగ్గకుండా.. కెరీర్​లో ముందుకు వెళ్లినవారెవరూ లేరు. ఏదేమైనా ఈ మెగాలీగ్​లో నా సామర్థ్యాన్ని నిరూపించుకుంటా.

గతేడాది మొయిన్​ అలీని ఎదుర్కోవడంలో ఇబ్బందిపడ్డారు. మరి ఈ సారి అతడిని ఎలా ఫేస్​ చేయనున్నారు?

నేను ఏ ఆటగాడిని ప్రత్యేకంగా లక్ష్యం చేసుకోను. అయినా ప్రతి ఆటగాడికి ఓ రోజు వస్తుంది.. ఆ సమయంలో సెంచరీ, డబుల్​ సెంచరీ బాదుతాడు. కానీ ఈ సారి బడా క్రికెటర్స్​ విరాట్​ కోహ్లీ, ధోనీ, ఏబీ డివిలియర్స్​ను టార్గెట్​ చేస్తా. దీనివల్ల నా బౌలింగ్​ సత్తా తెలుస్తుంది.

ఇది చూడండిఐపీఎల్​కు ఆలస్యంగా స్టార్ బౌలర్ మలింగ!