'సచిన్​తో ఓపెనింగ్ చేస్తూ.. బ్రెట్​లీని ఎదుర్కోవాలి'

సచిన్​తో మళ్లీ ఓపెనింగ్ చేయాలనుందని చెప్పాడు వీరేంద్ర సెహ్వాగ్. ఇందుకోసం వచ్చే ఏడాది జరగనున్న 'రోడ్  సేఫ్టీ వరల్డ్​ సిరీస్'​ కోసం ఆత్రుతగా ఎదురుచూస్తున్నానని అన్నాడు. తాము బ్యాటింగ్ చేస్తూ.. బ్రెట్​లీని ఎదుర్కోవాలనుందని తెలిపాడు.

సచిన్ తెందూల్కర్ - వీరేంద్ర సెహ్వాగ్.. ఈ దిగ్గజ జోడీ టీమిండియాకు ఎన్నో అద్భుత విజయాలను అందించింది. అయితే మాస్టర్​తో మళ్లీ ఓపెనింగ్ చేయాలనుందని తన మనసులో మాట బయటపెట్టాడు వీరేంద్ర సెహ్వాగ్. ఇందుకోసం వచ్చే ఏడాది ఫిబ్రవరిలో జరగనున్న 'రోడ్ సేఫ్టీ వరల్డ్ సిరీస్'​ కోసం ఆత్రుతగా ఎదురుచూస్తున్నానని అన్నాడు.

"రోడ్ సేఫ్టీ వరల్డ్ సిరీస్'​లో చాలా మంది దిగ్గజ ఆటగాళ్లు మళ్లీ మైదానంలో అడుగుపెట్టనున్నారు. దీని కంటే పెద్ద విషయం, భద్రతపై అవగాహన పెంచడమే. ఇదో గొప్ప ముందడుగు. సచిన్​తో ఓపెనింగ్ చేస్తూ.. బ్రెట్​ లీని ఎదుర్కోవడం కోసం ఎంతో ఆత్రుతగా ఎదురుచూస్తున్నా" - వీరేంద్ర సెహ్వాగ్, భారత మాజీ క్రికెటర్.

అంతర్జాతీయ మ్యాచ్​ల్లో సచిన్ - సెహ్వాగ్ చివరిగా 2012లో ఆస్ట్రేలియా, శ్రీలంకతో జరిగిన ముక్కోణపు వన్డే సిరీస్​లో ఓపెనింగ్ చేశారు. ఈ మ్యాచ్​లో మొదటి పది ఓవర్లలోనే దాదాపు 100 పరుగులు చేసి 321 పరుగుల లక్ష్యాన్ని ఛేదించడంలో కీలక పాత్ర పోషించారు. విరాట్ 133 పరుగులతో 36.4 ఓవర్లలోనే లక్ష్యాన్ని పూర్తి చేసి టీమిండియాకు అద్భుత విజయాన్ని అందించాడు.

సచిన్ - సెహ్వాగ్ వన్డేల్లో 93 ఇన్నింగ్స్​ల్లో 42.13 సగటుతో 3,919 పరుగులు చేశారు. ఇందులో 12 వంద పరుగుల భాగస్వామ్యాలు ఉన్నాయి. 2002-2012 మధ్య కాలంలో ఇన్నింగ్స్ ఆరంభించిన ఈ జోడీ ప్రపంచంలోనే అత్యుత్తమ ఓపెనింగ్ ద్వయంగా గుర్తింపు తెచ్చుకుంది.