"కుడోస్‌ టీమిండియా! సువర్ణాక్షరాలతో చరిత్రను లిఖించారు. సగం జట్టు గాయాలతో దూరమైనా.. బయోబబుల్‌ వివాదాలు చుట్టుముట్టినా.. జాత్యహంకార వ్యాఖ్యలు ఎదురైనా.. మీ విజయాన్ని ఎవరూ ఆపలేకపోయారు. తొలి టెస్టు ఓటమి అనంతరం దెబ్బతిన్న చిరుతలా విరుచుకుపడ్డారు. తమ అడ్డా అని గర్వంగా చెప్పుకునే గబ్బాలో ఆస్ట్రేలియాకు ఓటమి రుచి చూపించి.. భారత్ సత్తాని ప్రపంచానికి మరోసారి చాటిచెప్పారు" అంటూ టీమ్ఇండియాపై ప్రశంసల జల్లు కురుస్తోంది.
"ఇది కచ్చితంగా అద్భుతం. భారత క్రికెట్కు మరపురాని అనుభూతి. వారు ఆటకు కాపాడుకోవడానికి మాత్రమే ఆడలేదు. సగర్వంగా వెనుదిరగాలని అనుకున్నారు. చేసి చూపించారు. నవభారత్ దేనికీ భయపడదని చాటి చెప్పారు."
- సునీల్ గావస్కర్
"ఆనందంతో పిచ్చోడ్ని అయిపోయా. ఇది నవభారత్. వెన్ను చూపదు. అడిలైడ్ నుంచి ఇప్పటివరకు జరిగింది చూస్తుంటే.. ఈ కుర్రాళ్లు జీవితకాలానికి సరిపడ ఆనందాన్ని ఇచ్చారు. ప్రపంచకప్లు గెలిచాం. కానీ ఇది ప్రత్యేకం. పంత్.. మరింత ప్రత్యేకం."
- వీరేంద్ర సెహ్వాగ్
"భారతీయుడిగా గర్వపడుతున్నా. వెయ్యి రెట్లు రోమాలు నిక్కపొడిచిన భావోద్వేగం ఇది."
- గౌతం గంభీర్
"గబ్బాలో ఆసీస్‌ రికార్డుకు చరమగీతం పాడారు. ఇది చరిత్ర. ఇది యువ భారత్ పోరాటం. ఇది గొప్ప టెస్టు విజయం. పంత్, సుందర్‌, గిల్, సిరాజ్ అద్భుత ప్రదర్శన చేశారు. అజింక్య రహానె నాయకుడై నడిపించాడు."
- హర్షా భోగ్లే
"టీమ్ఇండియాకు చారిత్రక విజయం. అవసరమైన సమయంలో కుర్రాళ్లు అదరగొట్టారు. వారిని పంత్, గిల్ ముందుండి నడిపించారు. విజయంలో కీలకపాత్ర పోషించిన రవి శాస్త్రి, సహాయ సిబ్బందికి అభినందనలు. ఈ జట్టును చూస్తుంటే గర్వంగా ఉంది. చాలా కాలం రాణిస్తారు."