అప్పుడు నగ్నచిత్రంతో.. ఇప్పుడు వీడ్కోలుతో షాక్​!

ఇంగ్లాండ్ మహిళా వికెట్ కీపర్ సారా టేలర్ అంతర్జాతీయ క్రికెట్​కు వీడ్కోలు పలికింది. 30 ఏళ్ల సారా అనారోగ్యం కారణంగా ఈ నిర్ణయం తీసుకున్నట్లు తెలిపింది.

నగ్నంగా కీపింగ్ చేస్తూ.. కొన్ని రోజుల క్రితం అందరినీ ఆశ్చర్యపరిచిన ఇంగ్లాండ్ మహిళా క్రికెటర్ సారా టేలర్ మరోసారి సంచలనం రేపింది. అంతర్జాతీయ క్రికెట్​కు వీడ్కోలు పలుకుతూ షాక్​కు గురిచేసింది. మానసిక ఆందోళనతో బాధపడుతున్న ఆమె ఇకపై క్రికెట్ ఆడలేనని తెలిపింది. ఈ విషయాన్ని ట్విట్టర్ ద్వారా తెలియజేసింది.

"2006లో నా కల నెరవేరింది. ఇన్నేళ్లలో నేను సాధించనదానిపట్ల గర్వపడుతున్నా. ఉత్తమ క్రీడాకారులతో కలిసి ఆడా. నా ఆరోగ్యం దృష్ట్యా వీడ్కోలు పలికేందుకు ఇదే మంచి సమయం అనుకుంటున్నా. ఇంగ్లాండ్ జెర్సీ ధరించి ఆడిన ప్రతీ నిమిషాన్ని ఆస్వాదించా. నాకు మద్దతుగా నిలిచిన ప్రతి ఒక్కరికి ధన్యవాదాలు" -సారా టేలర్, ఇంగ్లాండ్ వికెట్ కీపర్

ఇంగ్లాండ్ తరపున అత్యధిక పరుగులు చేసిన రెండో మహిళా క్రికెటర్​గా ఘనత సాధించింది టేలర్​. 2006లో అరంగేట్రం చేసిన ఈమె మూడు ఫార్మాట్లలో కలిపి 226 మ్యాచ్​ల్లో 6వేల 533 పరుగులు చేసింది. ఇటీవలే మహిళల ఆరోగ్య సమస్యలపై అవగాహన కల్పించేందుకు సామాజిక మాధ్యమంలో నగ్నచిత్రం పోస్ట్ చేసి సంచలనం సృష్టించింది.

ఇదీ చదవండి: నగ్నంగా కీపింగ్ చేసిన ఇంగ్లీష్ క్రికెటర్​!