వన్డే ప్రపంచకప్ ఫైనల్ తర్వాత ఇంగ్లాండ్, న్యూజిలాండ్ జట్లు మరోసారి తలపడ్డాయి. ఐదు మ్యాచ్ల టీ20 సిరీస్‌లో భాగంగా ఓవల్ వేదికగా శుక్రవారం తొలి టీ20 జరిగింది. ఈ మ్యాచ్లో ఇంగ్లీష్‌ జట్టు 7 వికెట్ల తేడాతో ఘనవిజయం సాధించింది.
తొలుత టాస్‌ గెలిచి బౌలింగ్‌ ఎంచుకున్న ఆతిథ్య ఇంగ్లాండ్ జట్టు... కివీస్‌ను 153/5కు పరిమితం చేసింది. న్యూజిలాండ్ బ్యాట్స్మెన్లు రాస్‌ టేలర్‌(44), టిమ్‌ సీఫెర్ట్‌(32) రాణించారు. అనంతరం బ్యాటింగ్‌కు దిగిన ఇంగ్లాండ్... 18.3 ఓవర్లలో లక్ష్యాన్ని ఛేదించింది. బెయిర్ స్టో(35), జేమ్స్ విన్స్‌(59; 38 బంతుల్లో 7 ఫోర్లు, 2 సిక్సర్లు), ఇయాన్‌ మోర్గాన్‌(34*; 21 బంతుల్లో 4 ఫోర్లు, 1 సిక్సర్‌) రాణించడం వల్ల మొదటి మ్యాచ్లో ఇంగ్లాండ్ శుభారంభం చేసింది. ఫలితంగా 1-0 ఆధిక్యంలోకి దూసుకెళ్లింది.