ఇంగ్లాండ్​- దక్షిణాఫ్రికా ద్వైపాక్షిక సిరీస్​కు గ్రీన్​సిగ్నల్​

ఇంగ్లాండ్​ క్రికెటర్లు దక్షిణాఫ్రికా పర్యటనకు వెళ్లేందుకు అడ్డంకులు తొలగాయి. నవంబరులో పరిమిత ఓవర్ల సిరీస్​ను నిర్వహించాలని ఇరు దేశాల క్రికెట్​ బోర్డులు నిర్ణయించాయి. ఈ ద్వైపాక్షిక సిరీస్​లో ఇంగ్లాండ్ ఆటగాళ్ల కోసం దక్షిణాఫ్రికా ప్రభుత్వం నిబంధనలను సడలించనుంది.

నవంబరులో దక్షిణాఫ్రికా, ఇంగ్లాండ్​ మధ్య పరిమిత ఓవర్ల సిరీస్​ జరగనుంది. దక్షిణాఫ్రికాలో ఇటీవలే ప్రయాణ ఆంక్షలు తొలగడం వల్ల బయో-బబుల్​ను ఏర్పాటు చేసి ఈ సిరీస్​ నిర్వహించాలని ఇరు దేశాల క్రికెట్​ బోర్డులు నిర్ణయించాయి.

కరోనా కేసులు అధికంగా ఉన్న 22 దేశాల నుంచి ప్రయాణికులను దక్షిణాఫ్రికాకు అనుమతించడం లేదు. ఆ జాబితాలో బ్రిటన్​ కూడా ఉంది. కానీ, ఈ పర్యటనలో ఇంగ్లాండ్​ ఆటగాళ్లకు దక్షిణాఫ్రికా ప్రభుత్వం నిబంధనలను సడలించింది. ఈ సిరీస్​లో భాగంగా సఫారీ జట్టుతో మూడు వన్డేలు, మూడు టీ20లను ఇంగ్లాండ్​ ఆడనుంది. అందులో నాలుగు మ్యాచ్​లను కేప్​ టౌన్​లో ఆడనుండగా.. మిగిలిన రెండు మ్యాచ్​లకు పార్ల్​ వేదిక కానుంది.

నవంబరు 16న ప్రత్యేక విమానంలో ఇంగ్లాండ్ క్రికెటర్లు దక్షిణాఫ్రికా చేరనున్నారు. టీ20లు నవంబరు 27, 29, డిసెంబరు 1న జరగనుండగా.. వన్డేలు డిసెంబరు 4, 6, 9 తేదీల్లో నిర్వహించనున్నారు. ఇంగ్లాండ్​ క్రికెటర్లు దక్షిణాఫ్రికా చేరిన తర్వాత వారం రోజుల పాటు నిర్బంధంలో ఉంటారు. కానీ, ఆ సమయంలో ప్రాక్టీసుకు అనుమతిస్తారు.