ధోనిని తలపించిన ఇంగ్లాండ్​ క్రికెటర్లు

పాకిస్థాన్​తో జరిగిన ఐదో వన్డేలో ఇంగ్లాండ్​ క్రికెటర్లు చేసిన రెండు రనౌట్లు​ క్రికెట్ అభిమానులను ఆకట్టుకున్నాయి. అచ్చం ధోనిలాగే చేసి ఇద్దరు పాక్​ బ్యాట్స్​మెన్​ పెవిలియన్​కు పంపారు.

లీడ్స్​లో పాకిస్థాన్​తో జరిగిన ఐదో వన్డేలో ఇంగ్లాండ్​ 54 పరుగుల తేడాతో విజయం సాధించింది. ఐదు వన్డేల సిరీస్​ను 4-0 తేడాతో గెలుచుకుని ప్రపంచకప్​కు సిద్ధమైంది. ఈ మ్యాచ్​లో ఇంగ్లండ్​ కీపర్ బట్లర్, స్పిన్నర్ ఆదిల్​ రషీద్​.. పాక్​ బ్యాట్స్​మెన్​ను రనౌట్ చేసే క్రమంలో ధోనిని తలపించారు. ఆ వీడియోలు ప్రస్తుతం నెట్టింట వైరల్ అవుతున్నాయి.

352 పరుగుల లక్ష్యంతో బరిలోకి దిగింది పాకిస్థాన్. 27 ఓవర్​లో రషీద్​ వేసిన బంతిని డిఫెన్స్ ఆడి పరుగు తీసేందుకు ప్రయత్నించాడు సర్ఫరాజ్. నాన్ స్ట్రయిక్ ఎండ్​లో ఉన్న బాబర్​ ఆజమ్ పరుగు తీయబోతూ వెనక్కి వచ్చేశాడు. ఆ సమయంలోనే కీపర్ బట్లర్.. రషీద్​కు బంతిని అందించాడు. వికెట్లను చూడకుండానే గిరాటేసి అతడ్ని ఔట్ చేశాడు రషీద్​.

ఈ మ్యాచ్​లో పాక్ కెప్టెన్ సర్ఫరాజ్ శతకం చేజార్చుకున్నాడు. దానికి కారణం ఇంగ్లాండ్​ కీపర్ బట్లర్. సర్ఫరాజ్ బంతిని స్లిప్​లోకి ఆడబోయాడు. వేగంగా కదిలిన బట్లర్ ధోని స్టైల్లో కాలితో బంతిని ఆపాడు. వెంటనే స్పందించి సర్ఫరాజ్​ను రనౌట్​ చేశాడు.