విండీస్ క్రికెట్​ పీడ విరగడైంది: బ్రావో

విండీస్ మాజీ క్రికెటర్ డ్వేన్ బ్రావో.. ఆ దేశ క్రికెట్ బోర్డు మాజీ అధ్యక్షుడు డేవ్ కేమరూన్​ను తీవ్రంగా విమర్శించాడు. అతడి పదవి కాలం ముగియడం తనకెంతో ఆనందంగా ఉందని అన్నాడు.

వెస్టిండీస్ క్రికెట్ బోర్డు మాజీ అధ్యక్షుడు డేవ్ కేమరూన్​పై తీవ్ర స్థాయిలో విమర్శలు చేశాడు ఆ దేశ మాజీ క్రికెటర్ డ్వేన్ బ్రావో. తన కెరీర్ అర్ధాంతరంగా ముగిసిపోవడానికి కారణం అతడేనని, చాలా మంది కెరీర్​ల​ను నాశనం చేశాడని మండిపడ్డాడు. కేమరూన్ పదవి కాలం ముగియడం శుభ పరిణామమని సంతోషం వ్యక్తం చేశాడు.

"కొంత మంది ప్రతీకార చర్యల వల్లే వెస్టిండీస్ క్రికెట్ కష్టాల్లో పడింది. అలాంటి వారి వల్ల చాలా మంది ఆటకు గుడ్​బై చెప్పారు. ఏది ఏమైనప్పటికీ దేవుడు ఉన్నాడు. నియంత పాలన అంతమైంది. పీడ విరగడైంది. కొత్త అధ్యక్షుడిగా బాధ్యతలు చేపట్టనున్న రికీ స్కిరిట్ట్​తోనైనా విండీస్ క్రికెట్ మారుతుందని ఆశిస్తున్నా" - డ్వేన్ బ్రేవో, విండీస్ మాజీ క్రికెటర్.

2014 భారత పర్యటనలో విండీస్ కెప్టెన్​గా ఉన్న బ్రావో.. ఆ దేశ బోర్డుకు ఎదురుతిరిగాడు. జీతభత్యాల విషయంలో బోర్డు అలసత్వం ప్రదర్శించడం వల్ల అప్పటికప్పుడే భారత పర్యటనను రద్దు చేసుకొని స్వదేశం వెళ్లిపోయాడు. ఈ కారణంగా ఐదు వన్డేల సిరీస్​లో చివరి మ్యాచ్ రద్దయింది.

2018లో అంతర్జాతీయ మ్యాచ్​లకు గుడ్​బై పలికాడు బ్రావో. విండీస్​ తరఫున 40 టెస్టుల్లో 2,200 పరుగులతో పాటు 86 వికెట్లు తీశాడు. 164 వన్డేల్లో 2,968 పరుగులు.. 199 వికెట్లు తన ఖాతాలో వేసుకున్నాడు. 66 టీ20ల్లో 1,142 పరుగులు.. 52 వికెట్లు తీశాడు.

ఇదీ చదవండి: 'రాత్రివేళల్లో గులాబి బంతితో కొంచెం కష్టమే'