సెప్టెంబర్లో దక్షిణాఫ్రికా జట్టు భారత పర్యటనకు రానుంది. ఈ సిరీస్ కోసం టెస్టు, టీ20 జట్లను దక్షిణాఫ్రికా క్రికెట్ బోర్డు ప్రకటించింది. టీమిండియాతో జరగనున్న 3 టెస్టుల కోసం ముగ్గురు కొత్త ఆటగాళ్లకు చోటు కల్పించింది సఫారీ సెలక్షన్ కమిటీ.
పేసర్ ఎన్రిచ్ నొర్ట్‌జే, స్పిన్ బౌలింగ్ ఆల్ రౌండర్ సెనురన్ ముత్తుసామి, వికెట్ కీపర్/బ్యాట్స్‌మన్ రూడీ సెకండ్స్‌‌లు టెస్టుల్లో అరంగేట్రం చేయనున్నారు. టెస్టు జట్టు కెప్టెన్గా డుప్లెసిస్ వ్యవహరించనుండగా.. వైస్ కెప్టెన్గా బవుమాను బోర్డు ఎంపిక చేసింది.
టీ20ల నుంచి డుప్లెసిస్కు విశ్రాంతినిచ్చింది సెలక్షన్ కమిటీ. జట్టు వికెట్ కీపర్ డికాక్ను కెప్టెన్గా ఎంపిక చేశారు. ప్రపంచకప్లో సత్తాచాటిన వాన్డర్ డసెన్ వైస్కెప్టెన్ బాధ్యతలు నిర్వర్తించనున్నాడు. బవుమా, జోర్న్ ఫోర్టుయిన్‌లతో పాటు అన్రిచ్ నొర్ట్‌జేలు టీ20ల్లో అరంగేట్రం చేయనున్నారు.
మర్క్రమ్, తెయునిస్ డి బ్రూన్, లుంగి ఎంగిడిలను టీ20 సిరీస్‌కు సెలక్టర్లు పరిగణనలోకి తీసుకోలేదు. భారత పర్యటనలో భాగంగా దక్షిణాఫ్రికా జట్టు ఇండియా-ఏతో నాలుగు రోజులు వార్మప్ మ్యాచ్ ఆడనుంది. ఈ మ్యాచ్లో వీరు ఆడతారు. భారత పర్యటనలో భాగంగా దక్షిణాఫ్రికా సెప్టెంబర్ 15 నుంచి అక్టోబరు 23 వరకు 3 టీ20లు, 3 టెస్టు మ్యాచ్లు ఆడనుంది.