పీటర్సన్​కు స్పిన్​ పాఠాలు చెప్పిన ద్రవిడ్

ఐపీఎల్​ వల్ల తన ఆటతీరు మెరుగైందని చెప్పాడు మాజీ క్రికెటర్​ కెవిన్​ పీటర్సన్​. ద్రవిడ్​, సెహ్వాగ్​ల​తో కలిసి ఆడటం వల్ల షాట్ల ఎంపికలో మార్పు, స్పిన్​ను కట్టుదిట్టంగా ఎదుర్కోవడం నేర్చుకున్నట్లు తెలిపాడు.

యువ ఆటగాళ్లను అత్యుత్తమ క్రికెటర్లను తయారు చేసే భారత మాజీ క్రికెటర్ రాహుల్​ ద్రవిడ్​.. తన బ్యాటింగ్​ మెరుగుపడటంలోనూ సహాయపడ్డాడని చెప్పాడు ఇంగ్లాండ్​ మాజీ కెప్టెన్​ కెవిన్​ పీటర్సన్​. ముఖ్యంగా స్పిన్ ఎదుర్కోవడంలో అతడు చెప్పిన పాఠాలు బాగా పనికొచ్చాయని తెలిపాడు. ఐపీఎల్​లో వల్ల తన ఆటతీరు మెరుగైందని.. ద్రవిడ్, సెహ్వాగ్​ లాంటి ప్రపంచస్థాయి ఆటగాళ్లతో ఆడటం గొప్ప అనుభూతి అని అన్నాడు​.

"స్పిన్​ ఎదుర్కోవడం గురించి ద్రవిడ్​ పాఠాలు చెప్పారు. బంతి డెలివరీ అయ్యాక లెంగ్త్​ చూసుకొని ఆడాలని పలు సూచనలు ఇచ్చారు. అవి నా ఆటతీరును పూర్తిగా మార్చేశాయి" అని పీటర్సన్​ తెలిపాడు.

ఐపీఎల్​లో డెక్కన్​ ఛార్జర్స్​, దిల్లీ డేర్​డెవిల్స్​, రాయల్​ ఛాలెంజర్స్​ బెంగళూరు, సన్​రైజర్స్​ హైదరాబాద్​ తరఫున ఆడాడు పీటర్సన్​. పదేళ్ల అంతర్జాతీయ కెరీర్​లో ప్రపంచంలోని విధ్వంసకర బ్యాట్స్​మెన్​లో ఒకడిగా పేరు తెచ్చుకున్నాడు. 104 టెస్టుల్లో 8181 పరుగులు, 134 వన్డేల్లో 4440 పరుగులు​ చేశాడు.

కరోనా ప్రభావంతో వాయిదా పడిన ఐపీఎల్.. ఈ ఏడాది​ సెప్టెంబర్​ 19 నుంచి నవంబర్​ 10 మధ్య యూఏఈ వేదికగా జరగనుంది. దేశంలో ప్రస్తుత పరిస్థితుల కారణంగా చాలా రోజుల తర్వాత మెగాటోర్నీని విదేశాల్లో నిర్వహిస్తున్నారు.