దెబ్బతగిలాక అలా ఆడకూడదని బుద్దొచ్చింది!

భారత్​-ఏ జట్టుతో శుక్రవారం జరిగిన వన్డేలో న్యూజిలాండ్​ ఆల్​రౌండర్​ జేమ్స్​ నీషమ్​ గాయపడ్డాడు. ఈ మ్యాచ్​లో రివర్స్​ స్వీప్​ ఆడేందుకు ప్రయత్నించి విఫలమయ్యాడు. ఫలితంగా ముఖంపై గాయమైంది. ఈ దెబ్బతగిలాక బుద్దొచ్చిందంటూ తాజాగా ట్వీట్​ చేశాడీ కివీస్​ ఆటగాడు.

క్రెస్ట్‌చర్చ్‌ వేదికగా భారత్‌-ఏతో జరిగిన అనధికారిక వన్డేలో తాను ఓ పాఠం నేర్చుకున్నాని చెప్పాడు న్యూజిలాండ్‌ ఆల్‌రౌండర్‌ జేమ్స్​ నీషమ్‌. శుక్రవారం జరిగిన మ్యాచ్​లో ఈ ఆటగాడి దవడకి గాయమైంది. టీమిండియా ఆల్‌రౌండర్‌ కృనాల్ పాండ్య బౌలింగ్‌లో అతడు రివర్స్‌ స్వీప్‌ షాట్‌ ఆడటానికి ప్రయత్నించి గాయపడ్డాడు. ఫిజియో వచ్చి గాయాన్ని పరీక్షించిన తర్వాత అతడు మైదానాన్ని వీడాడు. కొద్దిసేపు తర్వాత క్రీజులోకి తిరిగొచ్చి 33 పరుగులతో అజేయంగా నిలిచాడు. ఈ మ్యాచ్​లో కివీస్-ఏ జట్టు 29 పరుగుల తేడాతో విజయం సాధించింది.

మ్యాచ్‌ అనంతరం గాయం ఫొటోని తన ట్విటర్‌లో పోస్ట్‌ చేశాడు జేమ్స్​ నీషమ్​. " ఈ రోజు ఓ పాఠం నేర్చుకున్నాను. ముఖానికి గాయం తగిలేలా ఎప్పుడూ రివర్స్‌ స్వీప్‌ షాట్‌ ఆడకూడదు" అని నీషమ్‌ ట్వీట్​ చేశాడు. దీనికి కివీస్ మాజీ ఆటగాడు మెక్‌కల్లమ్‌ సరదాగా బదులిచ్చాడు. "నువ్వు ఇలానే కొనసాగించాలి" అని కామెంట్ చేశాడు.

ఈ మ్యాచ్‌లో తొలుత బ్యాటింగ్​ చేసిన న్యూజిలాండ్ -ఏ నిర్ణీత 50 ఓవర్లలో ఏడు వికెట్ల నష్టానికి 295 పరుగులు చేసింది. జార్జ్‌ వర్కర్‌ (135) శతకం బాదాడు. భారత బౌలర్లలో ఇషాన్ మూడు, సిరాజ్‌ రెండు వికెట్లు పడగొట్టారు. అనంతరం బరిలోకి దిగిన భారత్-ఏ జట్టు తొమ్మిది వికెట్లు కోల్పోయి 266 పరుగులే చేసింది. కృనాల్ పాండ్య (51), ఇషాన్‌ కిషన్‌ (44), విజయ్‌ శంకర్‌ (41) పోరాడినా ఫలితం దక్కలేదు.