టీమ్ఇండియా మాజీ సారథి, చెన్నై సూపర్ కింగ్స్ కెప్టెన్‌ మహేంద్రసింగ్‌ ధోనీ ప్రపంచంలోనే అత్యుత్తమ వ్యక్తి అని దక్షిణాఫ్రికా మాజీ స్పిన్నర్‌ ఇమ్రాన్ తాహిర్ అన్నాడు. ధోనీ సారథ్యంలో ఆడేందుకు తాను ఇష్టపడతానని చెప్పాడు. చెన్నై కెప్టెన్‌ అమోఘమైన వ్యక్తి అని పొగడ్తలతో ముంచెత్తాడు.
"ధోనీతో ఆడటం నా అదృష్టం. అతడితో కలిసి మూడేళ్లుగా ఆడుతున్నా. గొప్ప మనసున్న వ్యక్తి. ప్రతి ఒక్కర్నీ అర్థం చేసుకుంటాడు. అందర్నీ గౌరవిస్తాడు. అందుకే, ధోనీ అంటే అందరికీ అమితమైన ఇష్టం. ఆటపై అతడికి పూర్తి అవగాహన ఉంది. ప్రపంచంలోనే అత్యుత్తమ సారథి. అతడికి మనం చెప్పాల్సింది ఏమీ ఉండదు. బౌలర్లకు అనుకూలంగా ఫీల్డింగ్‌ ఎలా సెట్‌ చేయాలనే విషయం ధోనీకి తెలుసు. అతడితో ఉంటే చాలా నేర్చుకోవచ్చు. మరింత కాలం చెన్నైకి ఆడాలని కోరుకుంటున్నా."