యూఏఈ వేదికగా సెప్టెంబరు 19న ఐపీఎల్ ప్రారంభం కానున్నట్లు బీసీసీఐ ప్రకటించిన నేపథ్యంలో.. సంబంధిత ఫ్రాంచైజీలు సన్నాహాలు ప్రారంభించాయి. ఈ క్రమంలోనే చెన్నై సూపర్కింగ్స్ జట్టు అన్ని టీమ్ల కంటే ముందుగానే యూఏఈ చేరుకోవాలని చూస్తోంది. తాజాగా లీగ్ విషయంలో మరింత స్పష్టత కోసం చెన్నై యాజమాన్యం.. ఐపీఎల్ పాలక మండలిని సంప్రదించింది.
మరో రెండు రోజుల్లో ఐపీఎల్ జట్లకు స్టాండర్డ్ ఆపరేటింగ్ ప్రోసీజర్స్(ఎస్ఓపీ)ని అందజేస్తామని పాలక మండలి హామీ ఇచ్చినట్లు సీఎస్కే ఫ్రాంచైజీ అధికారులు తెలిపారు. అంతేకాకుండా ఈ వారంలో ఐపీఎల్ పాలక మండలి, అన్ని ఫ్రాంచైజీలు సమావేశం కానున్నట్లు తెలిపారు.
ఐపీఎల్ పర్యటనలో భాగంగా యూఏఈలో అందరి కంటే ముందే అడుగుపెట్టాలని సీఎస్కే భావిస్తోంది. అయితే ఆగస్టు 20 వరకు ఎటువంటి అనుమతులు ఇవ్వబోమని ఐపీఎల్ పాలక మండలి స్పష్టం చేసింది. త్వరలో జరగనున్న సమావేశం అనంతరం అన్నింటిపై ఓ స్పష్టత వస్తుందని ఫ్రాంచైజీ అధికారులు తెలిపారు.
మరోవైపు ధోనీ, అతని జట్టు సభ్యులు చెన్నైకి చేరుకునే ముందు కరోనా పరీక్షలు చేయించుకుంటారని వివరించారు. నెగిటివ్ అని తేలిన ఆటగాళ్లు, సహాయక సిబ్బందిని.. సమావేశమైన 48 గంటల్లోపు యూఏఈకి పంపించేందుకు ప్రణాళిక రచిస్తున్నారు. వీసా ప్రక్రియపై స్పందిస్తూ.. ప్రస్తుతం భారత ప్రభుత్వం నుంచి అనుమతి వచ్చిన తర్వాత ఈ విషయంపై ఆలోచిస్తామని ఫ్రాంచైజీ అధికారులు స్పష్టం చేశారు.
