భారత క్రికెటర్ శిఖర్ ధావన్ చేసిన పనికి ఓ పడవ నడిపే వ్యక్తిపై చర్యలు తీసుకోనున్నారు వారణాసి జిల్లా కలెక్టర్ కౌశల్ రాజ్ శర్మ. అయితే ధావన్ చేసిందల్లా కొన్ని పక్షులకు ఆహారం అందించడమే.
ధావన్ ఇటీవల వారణాసి పర్యటనకు వెళ్లి.. కొన్ని ఫొటోలను సామాజిక మాధ్యమాల్లో పంచుకున్నాడు. అందులో పక్షులకు ఆహారం తినిపిస్తూ కనిపించిన గబ్బర్.. ఆ పని ఎంతో సంతోషాన్నిచ్చిందని క్యాప్షన్ పెట్టాడు. అయితే ఇప్పుడు అదే ఫొటో వారణాసిలో అతడు పయనించిన పడవ నడిపే వ్యక్తిపై చర్యలు తీసుకోవడానికి కారణమైంది.
కొద్ది రోజులుగా పలు రాష్ట్రాల్లో బర్డ్ఫ్లూ కలకలం సృష్టిస్తోంది. ఈ నేపథ్యంలో పక్షులకు ఎలాంటి ఆహారం అందించరాదని వారణాసిలో ఆదేశాలు జారీచేశారు. ఈ క్రమంలో ధావన్ చర్య పడవ నడిపే వ్యక్తిపై శిక్షగా మారింది.
"పడవలు నడిపేవారికి మేము స్పష్టమైన ఆదేశాలు ఇచ్చాం. పర్యాటకులను పక్షులకు ఆహారం అందించకుండా చూడమని చెప్పాం. కానీ ఆ ఉత్తర్వులను కొందరు పాటించడంలేదని మా దృష్టికి వచ్చింది. ఇప్పటికే పలువురిని గుర్తించాం. వారిపై చర్యలు తీసుకుంటాం. వారి లైసెన్స్ను ఎందుకు రద్దు చేయకూడదో ప్రశ్నిస్తాం. సాధారణంగా పర్యాటకులను ఇలాంటి విషయాలపై అవగాహన ఉండదు కాబట్టి వారిపై ఎలాంటి చర్యలు తీసుకోవడం లేదు," అని కౌశల్ రాజ్ తెలిపారు.
జనవరి 21నాటికి 6 రాష్ట్రాల్లో పౌల్ట్రీ, కాకులు, వలస పక్షులకు 10 రాష్ట్రాల్లో బర్డ్ఫ్లూ సోకిందని గురువారం కేంద్ర ప్రభుత్వం వెల్లడించింది. పరిస్థితిని అంచనా వేయడానికి కేంద్ర బృందం ఇప్పటికే ప్రభావిత ప్రాంతాల్లో పర్యటిస్తోంది.
