ఇండియన్ ప్రీమియర్ లీగ్లో ఆడాలని ఎంతో ఆత్రుతగా ఉన్నట్లు చెప్పాడు ఇంగ్లాండ్ సారథి జో రూట్. అయితే అతడు ఈ ఏడాది ఐపీఎల్ వేలానికి దరఖాస్తు చేసుకోలేదు. అందుకు గల కారణాన్ని వివరించాడు ఈ స్టార్ బ్యాట్స్మన్.
"నా కెరీర్లో ఒక దశలో ఐపీఎల్లో ఆడాలని బలంగా కోరుకున్నా. అందులో భాగస్వామినై, దానిని అనుభూతి చెందాలని అనుకున్నా. అయితే అంతర్జాతీయ క్రికెట్లో మరీ ముఖ్యంగా టెస్టుల్లో ఆడాల్సి ఉన్నందున ఈ ఏడాది ఐపీఎల్ వేలానికి నమోదు చేసుకోలేదు. అది చాలా కఠినమైన నిర్ణయం. వచ్చే ఏడాది ఐపీఎల్లో ఆడే ఆవకాశం దక్కుతుందని భావిస్తున్నా." అని రూట్ అన్నాడు.
రెండో టెస్టు నుంచి మైదానాల్లో ప్రేక్షకులు రావడం పట్ల హర్షం వ్యక్తంచేశాడు రూట్. అభిమానులు, క్రికెటర్ల మధ్య సంభాషణ ఎంతో ప్రత్యేకమన్నాడు. భారతీయులు క్రికెట్ పట్ల ఎంతో ఆదరణ చూపిస్తారని, అది వారి జీవితంలో భాగమని చెప్పాడు.
ఇక భారత్తో జరిగే మూడో టెస్టుకు పేస్ ద్వయం జోఫ్రా ఆర్చర్, జేమ్స్ అండర్సన్ అందుబాటులో ఉంటారని రూట్ స్పష్టం చేశాడు. మోచేతి గాయం కారణంగా ఫిబ్రవరి 13న ప్రారంభమయ్యే రెండో టెస్టుకు ఆర్చర్ అందుబాటులో ఉండటంలేదు. నాలుగు మ్యాచ్ల సిరీస్లో చివరి రెండు టెస్టుల్లో ఉత్తేజకరంగా బరిలోకి దిగేందుకు రెండో టెస్టుకు అండర్సన్కు విశ్రాంతినిచ్చారు.
ఇదీ చూడండి:నాలుగు మార్పులతో రెండో టెస్టుకు ఇంగ్లాండ్ రె'ఢీ'
