ఆస్ట్రేలియాలో సంభవించిన కార్చిచ్చును చూసి తానింకా షాక్‌లో ఉన్నానని ఆ జట్టు స్టార్ బ్యాట్స్‌మన్‌ డేవిడ్ వార్నర్ అన్నాడు. కొద్ది రోజులుగా ఆస్ట్రేలియాలో విస్తరిస్తున్న అగ్నికీలలకు ఇప్పటికే 18 మంది మృతి చెందారు. ఈ నేపథ్యంలో వార్నర్ ట్విట్టర్లో స్పందిస్తూ ఒక భావోద్వేగపూరిత పోస్టు పెట్టాడు. అందులో ఒకాయన నది ఒడ్డున కూర్చొని మంటలను చూస్తుండగా పక్కనే ఓ శునకం కూడా ఉంది.
"నేనిప్పుడే ఈ ఫొటో చూశా. ఇంకా షాక్‌లో ఉన్నా. ఆస్ట్రేలియా, న్యూజిలాండ్ జట్లు రేపు మ్యాచ్‌ ఆడనున్నాయి. ఇలాంటి పరిస్థితుల్లో జీవించి ఉన్నందుకు ఎంత అదృష్టవంతులమో ఎన్నటికీ మర్చిపోలేము. ఈ మంటలను ఆర్పే అగ్నిమాపక సిబ్బందితో పాటు వారికి సహకరిస్తున్న వాలంటీర్లందరికి.. నాతో పాటు మా కుటుంబ సభ్యుల ఆశీస్సులు ఉంటాయి. ఈ మంటలు మాటలకందనివి. మీరే అసలైన హీరోలు, మేం గర్వపడేలా ప్రకృతి విపత్తులను ఎదుర్కొంటారు."
-వార్నర్, ఆసీస్ క్రికెటర్